Oca gisugo lang?

Dugay na ko kadungog og tabi-tabi may labot sa korupsiyon diha sa korte apan lisud ang pagprobar niini. Sa taud-taud nako nga pag-cover sa Palace of Justice di na bag-o nako ang mga estorya nga dunay mga kawani sa korte nga mamaligya og desisyon sa huwis.

Apan ang tanan pulos tabi-tabi nga way ebidensiya tungod kay wa may bisan usa nga mobarug ug moangkon nga siya nabiktima sa maong illegal nga kalihukan.

Apan niadtong miaging semana, nahatagan og dagway ang dugay na nga pasangil sa korupsiyon diha sa korte human usa ka kawani sa Municipal Trial Court in Cities branch 1 ang nadakpan dili lang sa pagpangilkil kun di hasta sa pagpangilad.

Si Arvin Oca nadakpan atol sa entrapment sa National Bureau of Investigation human usa ka Edmar Garciso ang mireklamo nga gikilkilan siya og P150 mil aron areglohon ang ahente sa Philippine Drug Enforcement Agency ug ang huwis nga moluwat sa search warrant batok niya.

Gipatuo ni Oca si Garciso nga dunay nag-ong-ong nga application sa search warrant ang PDEA batok niya tungod sa paggamit ug pagpamaligya og drugas. Ang maong application giingon nga didto sa sala ni Judge Enriquieta Belarmino og padulong na kini aprobahan sa huwis.

Apan bugti sa P150 mil giagni ni Oca si Garciso nga mamahimo niyang ipabasura sa huwis o ba kaha bakwion ang maong application.

Si Judge Belarmino nga nasayod sa modus ni Oca labihang pikala ug miawhag sa NBI nga paladman pa ang imbestigasyon. Nagtuo si Belarmino nga duna pay laing kakonsabo si Oca sa maong kalihukan.

Lakip si Executive Judge Fortunato de Gracia wa magtuo nga nag-inusara si Oca paghimo sa maong tinunto. Imposible nga ang usa ka yano nga process server mohimo og operasyon nga ingon niadto kadako kun wa siya’y gisaligan.

Ang akong mga tinubdan sa Palace of Justice mitug-an nga dunay agawon si Oca nga mas dako niya og ranggo. Gani dili siya maoy unang sakop sa maong opisyal nga nabulilyaso.

Matud sa akong tinubdan nga niadtong una nasakpan na ang sulogoon sa maong opisyal ug gani gitaktak na sa serbisyo sa Korte Suprema. Usa ka empleyado sa korte miingon nga naluoy sila ni Oca tungod kay samtang siya maoy nadakpan og siguradong manubag sa kaso ang iyang agawon pabiling gawasnon og nagpadayon sa iyang pangwarta.

* * *

Si de Gracia admitido nga lisod pagpugong sa mga kalihukan nga sama niini. Kini tungod kay daghan ang mga empleyado sa korte ug dili maakos pagbantay ang tanan.

Pananglitan ang pagleak sa mga application sa search warrant nga posibleng usa sa mga panguwarta sa mga kurakot nga empleyado sa korte, matud ni De Gracia nga lisud ning pugngan tungod kay di man gyud kalikayan nga dunay mga empleyado nga masayod tungod kay sila man maoy mo-type niini.

Sagad sa mga modus diha sa korte sigun sa akong tinubdan mao nga ang mga kurakot nga empleyado mopahibawo sa mga subject sa search warrant nga rondahon sila ug mangayo og bayad.

Ang uban gani mamaligya gyud sa desisyon sa korte. Matud pa nga dunay mga empleyado, labi pa kadtong sugoon sa pag -type sa desisyon sa huwis nga moadto sa mga party sa kaso ug mangayo og kuwarta patuohon nga modaug sila sa kaso basta mobayad.

Apan ang tinuod nasayod na silang daan sa desisyon sa huwis kay sila man maoy nag-type niini.

Ang makalulooy mao ang mga huwis nga wa masayod nga ang ilang desisyon ginegosyo diay sa ilang mga sakop.

* * *

E-mal:   [email protected]