EDITORYAL - Don Sergio di hangol sa gahum

Gihandum sa tibuok nasud, ilabi na sa mga Sugbuanon, si Don Sergio Osmeña Sr. karong adlawa, kasumaran sa iyang ika – 130 nga pagkatawo.

Bisan kinsang Pilipinhon nga nakaila ni Don Sergio adunay dakong pagdayeg kaniya tungod kay lahi siya nga matang sa pagka politiko.

Si Don Sergio dili hangol sa gahum. Gani bisan sa buhi pa ang masakitong Presidente Manuel L. Quezon gitugyan na unta ngadto kaniya ang pagka-presidente, apan gibalibaran niya.

Buot ni Don Sergio nga sa pagpanaw na ni Quezon anaa gihapon niini ang pagka-presidente. Katungod niya ang paghulip ni Quezon kay bise presidente man siya adtong tungora.

Daghan ang nanghinaut nga duna pa untay mosubang nga laing Don Sergio sa natad sa politika sa Pilipinas.