Timbangan

Dili na bag-o kining reklamo mahitungod sa timbangan nga tikasan. Naa kini sa bisan asang dapit tungod kay sa tanang dapit naa man gyo'y mga negosyante nga gustong makapanikas bisan sa ginagmay'ng paagi ngadto sa mga pumapalit. Kay ang ginagmay kun modaghan ug magkanunay mahimo na man nga dako. Dili ba?

Ang naggamit sa cell. no. 0920-3172481 mi-text nako niadtong Mayo 29, 2008 (Sent: 12:50:06pm) nga nagkanayon: "Maayo untag ma-surprise og tsek ang timbangan og bugas sa merkado sa Mandaue. Nakapalit ko og bugas nga 6 kilos karon pero wala makapuno sa akong sudlanan og bugas. Morag 5 kilos ra. Mahal ra ba kaayo."

* * *

Maayo unta kun masusi kini sa market administration sa Mandaue ug ingon man sa komitiba sa merkado ug consumer protection sa lokal nga kagamhanan o konseho sa dakbayan.

* * *

Hangtod sa pagsulat nako niining lindog, daghan pa gihapon ko'g nadawat nga text mahitungod sa nagpadayong pagpayuhot sa ginadiling drugas diha sa Tambisan,  Labangon.

Ang sumbong nga naghatag og espisipikong detalye mao ang iyaha sa naggamit sa cell. no. 0926-3309950. Sa iyang text nako niadtong Mayo 26, 2008 (Sent: 11:13:12am), iyang gitumbok ang usa ka Jongjong nga maoy tigbaligya og shabu diha sa Tambisan.

"Dangan kaayo si Jongjong sa mga tawo diri sa Tambisan," nagkanayon ang nagpaila lang nga concerned citizen sa iyang text. "Maayo untag madakpan na siya."

* * *

Angay ning aksiyonan sa proper authorities. Mas maayo subayon ang lihok niining usa ka Jongjong nga gipasanginlang usa ka drug pusher. Morag madali ang pagkasikop ning tawhana kun moapil ang mga tanod ug opisyal sa barangay pag-monitor sa iyang kalihokan.

* * *

Ang naggamit sa cell. no. 0915-2139433 mitaho nako (Sent: 10:09:18am -- Mayo 29, 2008) nga ang dalan sa Edison St., sakop sa brgy. Apas, Cebu City gubaon na kaayo.

"Kahibalo kong humok og kasingkasing ning bag-o namong kapitan sa Apas, maayo untag mahatagan niyag pagtagad ang karsada," matud sa texter.

(Sumbong ug reklamo? Text sa 0910-8105522).