Public interest mopasuwabe

Angayan g’yod tinuod nga protehean ang kinabuhi ni Regional Trial Court (RTC) Judge Geraldine Faith Econg kay dili imposible nga duna g’yoy nagtinguha og dautan sa iyang kinabuhi.

Bisan pa gani og duna’y escort si Judge Econg dili man imposible nga magmalampuson gihapon ang mga tawo sa dautan nilang huna-huna kun ila g’yod nga tinguhaon. Apan arang-arang na lang kay posible nga ma-discourage pa sila.

Si Judge Econg god, gawas nga siya ang presiding judge sa RTC Branch 9 nga ania magbasi sa dakbayan sa Sugbu, siya usab ang nagdumala sa hukmanan didto sa Moalboal.

Sa ato pa, kinahanglang moadto g’yod siya sa Moalboal makausa sa usa ka semana aron mohusay sa mga kaso. Kun dunay magbinuang, posible nga dali ra siya nga banhigan.

Mao kini ang rason nga duha ka sakop sa PNP Criminal Investigation and Detection (CIDG)-7 gidistino pagbantay ni Judge Econg.

Wala pa makontento sa duha ka CIDG agents, si Mayor Tomas R. Osmeña midestino pa g’yod og laing polis – ang giila nga banggiitang polis dinhi sa dakbayan nga si SPO1 Adonis Dumpit.

Dalaygon ang gihimo ni Mayor Tommy kay nagpakabana siya sa kaluwasan ni Judge Econg. Apan wala kini makalikay sa pipila ka madudahon diha sa City Hall.

Dunay nagduda nga gihimo kini sa mayor aron nga makuha niini ang simpatiya sa huwes kay ang dakbayan dunay pending kaso nga gihuptan ni Judge Econg.

Naglambigit kini sa pagpa-garnish sa hukmanan sa kapin sa P20 milyones nga deposito sa City Hall sa bangko alang sa bayad sa yuta nga gipanag-iya ni Matilde Palicte.

Ang yuta ni Palicte diha sa Capitol Site gipalit unta ni sa City Hall niadtong 2001, apan gimahalan ra si Mayor Osmeña sa kantidad mao nga wala dayon bayri.

Tungod sa kadugay pagbayad sa City Hall, nahukman sa huwes nga pabayron ang dakbayan og dugang P6 milyones isip interest.

Buyno, bisan og maayo ang tumong ni Osmeña sa pagdestino sa iyang personal nga bodyguard ngadto kang Judge Econg, apan dili siya makalikay nga duna g’yoy magduda sa iyang gihimo.

* * *

Tambag nako sa mga drayber og trisikad nga gahi kaayo’g ulo nga mosulod gani mo sa mga karsada nga wala itugot sa mga trisikad, ayaw mo pagsibat kun masakpan mo sa traffic enforcers.

Kun inyo silang pagukod-gukoron, aw basin tuod og posible nga tuyoon mo sa pagpadam-ag aron malintuwad ang inyong trisikad ug makaangkon mo’g pangos, kun dili man mabagdok ang inyong ulo sa semento.

Bisan kun ako pa ang traffic enforcer, dili g’yod tingali ko makapasaylo ninyo. Huna-hunaa ninyo nga ang pagsulod ninyo sa mga “busy” kaayo nga karsada, makapasamot sa problema sa trapiko.

Dili lang nako tas-on kay nasayod ko nga mga buotan mo ug makasabot sa maayong pagpasabot.

* * *

Pahimudsan nako ang pagdayeg sa usa ka lumulopyo sa luyong bahin sa Marco Polo Plaza Hotel nga wala na g’yod tawon magsaba matag Sabado sa buntag.

Nakadawat ko og pasalamat sa mga silingan niya nga mihunong na ang maong tawo paggamit og amplifier pagsangyaw sa pulong sa Dios nga nakatugaw kanila.

Salamat kaayo Sir ha? Saludo g’yod ko nimo ug gidayeg nako ang imong kabuotan. Usbon ko, daghan kaayong salamat nga naminaw ka sa akong mga tambag.

* * *

Ang higala nako nga si Ramon Gallardo, nahibulong kay bisan ang akong suod, gikomentaryohan man kuno nako sa akong lindog sa mantalaan.

Ang akong tubag kaniya nga ingon g’yod ana kun ang isyu maglambigit na og public interest. Sama god nila ni Mayor Tommy, Kongresista Raul del Mar ug uban pa, mga higala nako sila apan usahay komentaryohan gihapon nako kun dunay isyu.