Shabu sud  sa menteryo

Gikan sa cellphone number 0929-3606094: "Sir, good day. Kining akong sumbong bahin sa menteryo diri sa Humayhumay, Pajo, Lapulapu City. Kusog kaayo ang baligyaanay og shabu sa sulod sa menteryo diri sa Humayhumay. Adlaw ug gabii ang baligyaanay og shabu. Maayo unta nga masumpo ni. Naa sulod sa sementeryo ang shabu. Mora man og gihimo nilang stock market ang lubnganan." -- (Sent: 08:44:39pm--December 23, 2007).

* * *

Atong sangpiton ang mga opisyal sa barangay diin nahisakop kining menteryo sa Humayhumay sa pagsusi niining reklamo sa atong texter. Angayang sutaon kun tinuod ba kini o dili. Mas maayong palihukon nila ang ilang mga barangay tanod aron pagsuta sa tinuod. Nagkinahanglan kini'g dinaliang aksiyon.

* * *

Ang atong texter nga naggamit sa cellphone number 0917-6182358 mipidangat kanatog kasayoran mahitungod sa usa ka estilo sa modus operandi. Ang estilo mao nga adunay tawo nga manungko sa inyong kabalayan ug magpaila nga usa ka ordinahan pagkapari. Mangayo siya'g donasyon nga dili momenos sa P1,000 alang (kuno) sa iyang sotana.

Ang maong tawo mopatuo nga ang duha niya ka igsuon nga madre atua na sa Escala, Spain. Mopatuo sab siya nga duna siyay scholarship. Gihulagway sa atong texter ang maong lalaki nga pikoton og mata, may pagkamahuyang ang lihok pero maayong manulti. Makadani gyod sa tawo nga motubay sa iyang mga pulong.

* * *

Pagbantay kamo niining maong estilo sa modus. Labing maayo nga sutaon una ninyo ang matuod pinaagi sa pagsukitsukit kun asa siya ordinahan. Sa higayon nga motug-an siya sa ngalan sa Simbahan, mas maayong tawagan ang kadagkoan sa maong Simbahan aron pagtino kun may ipahigayon ba gyod  nga ordinasyon ug nalakip ba sa ordinahan ang tawo nga misungko sa inyong panimalay.

"Maayo gyod seguro nga mapakgang kining buhata kay makadaot kini sa atong pagka Katoliko," nagkanayon ang atong texter.

Dili lang makadaot sa tinuohang Katoliko, makahasol pa gyod sa katawhan nga mabiktima ning iyang tinonto.

(Sumbong ug reklamo? Text sa 0910-8105522)