Kinsay angay'ng manubag?

Sayes milyones pisos maoy danyos nga gipangayo sa mahuyang nga pasyente sa Vicente Sotto Memorial Medical Center tungod sa kauwaw nga iyang nahiaguman human mokatap sa internet ug sa mga mobile phones ang video sa iyang operasyon. Niadtong miaging semana miduso siya og amended complaint didto sa Ombudsman aron mangayo sa maong kantidad isip danyos. Iyang katungod ang pagsang-at og kaso ug pagpangayo sa kantidad nga sa iyang tan-aw maoy tumbas sa kauwawan nga iyang naangkon.

Apan alang nako nisugod na og gimaw ang tinud-anay niyang motibo sa pagpatim-aw ug pagpangayo og hustisya sa kauwawan nga kunohay iyang nahiaguman. Samtang tinuod salawayon ang gihimo sa mga doktor ug nurses sa VSMMC nga pagbugal-bugal sa ilang pasyente, apan kinsa may angayang manubag sa kauwawan nga iyang nahiaguman? Ang mga doktor ug nurses ba? O ang mga medical interns nga didto atol sa maong hitabo? O ang pasyente mismo nga miboluntaryo sa pag-angkon nga siya maoy didto sa video? Atong hinumduman nga dili ang mga doktor sa VSMMC maoy nag-upload sa video ngadto sa internet.

Labaw nang di sila maoy nagkuha sa video tungod kay sila may nag-opera. Mao nga kun duna may angayang pangayo-an og P6 milyones nga danyos ang maong mahuyang di siguro ang mga doktor ug nurses kun di ang nagpakatap sa video sa internet. Labaw sa tanan ang tawo nga maoy nagguyod niya aron mopatim-aw ug moangkon nga siya mao ang pasyente nga nakuha sa video. Personal nako nga nakit-an ang video diha sa YouTube apan wa gyud makita ang dagway sa pasyente.

Busa kun moingon siya nga nauwawan siya, kinsa may nagpakauwaw sa iyang kaugalingon? Di ba siya ra usab mismo? Ambot og iya bang kabubut-on ang pagduol kang Kapitan Dave Tumulak o dunay naggalgal niya paghimo sa ingon, apan wa niya matimbangtimbang nga ang iyang paglutaw ug pang-angkon nga siya maoy didto sa video nagbutang niya sa dakong kauwawan. Hinaut nga ang iyang tumong mao lang gyud ang pagpangayo og hustisya ug dili ang pagpanapi sa mga doktor.

Alang nako sobra ra tingali ang P6 milyones nga iyang gipangayo isip danyos sanglit malampuson man ang operasyon. Kun nagbugal-bugal man ang mga doktor ug nurses sa iyang gidangatan, tukma na tingali ang pagpasaka nila og kasong administratiba. Angayan natong hinumduman nga ang pagbugal-bugal lahi kay sa pagpakauwaw.

Mahimong mahulagway nga bugalbugal ang gihimo sa mga doktor ug nurses tungod sa ilang pagpangatawa sud sa operating room, apan tataw nga wa nila pakauwawi ang pasyente. Ang nagpakauwaw sa pasyente mao ang nagpakatap sa video ug ang pasyente mismo tungod sa iyang paggawas ug pag-angkon nga siya maoy naa sa video bisan kun wa gyud hikit-i ang iyang dagway.

* * *

[email protected]