Abnormal nga OR

Gireklamo sa usa ka bayot ang usa ka  Dr. Arias ug ang mga kauban niining nurses ug medical interns sa Vicente Sotto Memorial Medical Center human siya ibutang niini sa kaulawan sa publiko.

Si Janjan (dili tinuod nga pangalan) nagpaopera sa iyang lubot (anus) sa nahisgutang tambalanan human kini paslaki og body spray sa lalaki nga iyang gikahilawas apan inay kay sabton ang iyang kahimtang gibugalbugalan, gibiay-biay ug gikataw-an hinuon samtang siya gioperahan. Di pa igo, gikuhaan pa gyod og audio/video ang iyang operasyon nga way pagtugot kaniya. Di lang kutob dinhi ang kalbaryo ni Janjan. Gisaw-an pa gyod karon sa kalibutan ang iyang kahimtang human mamantala sa YouTube ang bugalbugal sa iyang operasyon.

Ang operasyon dili kataw-anan, maunsa man kining matang sa operasyon o maski unsa man ka haniti ang Doctor nga naghimo sa operasyon. Abnormal lang ang maghimo niini ngadto sa ilang mga pasyente. Mga abnormal na ba ang mga doctor ug nurses nga nadistino sa operating room sa Vicente Sotto? Mao ba ni ang hinungdan kun nganong daghan nang nangamatay sa mga gipangoperahan ning maong tambalanan diin ang kasagaran niini nangabuak ang tahi kay daw duwa-duwa lang ni nila?

Niadtong miaging semana didto sa lungsod sa Alcoy hapit moabot sa napulo ka sakong NFA rice ang gikawat unya gisundan kini sa isla sa Bantayan diin laing 92 pod ka sakong NFA rice ang gikawat. Gikawat sa mga unggoy ang mga pagkaon didto sa Sipalay, Negros. Lisod na gyod ron ang panahon ug medyo nagnihit na gyod ang pagkaon kay ultimong unggoy mikanaog na sa bukid ug nangawat na og pagkaon.

Labing seguro ang nangawat sa bugas sa NFA mao ni ang mga tawo nga gikapuyan na sa pagpila sa mga tindahan sa NFA. Sayonan mo nga sa kataas sa linya nga iyang gipilahan pag-abot niya sa tumoy swerte pa kun aduna pay nahabilin  ug kun aduna pa may nahabilin, baligyaan ka lang og usa ngadto sa duha ka kilo.