Bugas ni King

Gi-quash na sa Regional Trial Court ang search warrant nga giisyu niini batok sa 70 container nga bugas nga iya sa negosyanteng si Reagan King tungod sa pagbalhin niini sa bodega nga walay lisensiya gikan sa National Food Authority.

Mapasalamaton kaayo ang negosyante tungod kay napapas na ang ‘authority’ sa National Bureau of Investigation (NBI-7) nga gigamit pagronda sa maong bodega nga nahimutang sa Cabangcalan, Mandaue.

Ang abogado niini nga si Gerardo Carillo, konsehal sa dakbayan sa Sugbo, nagkanayon nga nakorehian ang bati nga panglantaw sa publiko ngadto sa iyang kliyente nga si King human i-quash ni RTC Executive Judge Fortunato de Gracia Jr. ang warrant.

Wala man gud makalikay si King sa pagtuo sa publiko nga smuggled kadtong 70 containers nga Vietnam rice nga iyang gisulod sa bodega nga iya sa kanhi general manager sa Cebu Port Authority nga si Mariano Martinez.

Gironda sa NBI ang bodega ni Martinez aron motubag sa panawagan ni Pres. Gloria Arroyo nga monitoron kadtong mga bodega sa mga Intsik nga nanago (hoarding) og mga bugas humay taliwala sa krisis niini nga giatubang sa nasud.

Apan namumo ang NBI-7 tungod sa walay klarong impormasyon nga napupo ang ahente niining si Arnel Pura, hangtod mitipas sila sa una nilang rason sa pagpangronda, ngadto sa pagka-walay lisensiya sa bodega ni Martinez.

Karon nga na-quash na ang warrant, dili pa gihapon ma-release ang 70 containers nga bugas ni King tungod kay wala pa kini clearance gikan sa Office of the Commissioner sa Bureau of Customs.

Tungod kini sa alert order nga giisyu sa customs pagmando sa Customs Intelligence and Investigation Service (CIIS) paghimo og inventory sa mga bugas aron masayran kun nagsulti ba sa tinuod ang importer niini pila kini ka buok subay sa gibayran niini nga buhis nga P24 milyones, pagsusi sa report nga grabe ang undervaluation sa kargamento ug ang maong buhis hilabihang kagamay sa tinuod unta nga bayran niini.

Sa ato pa, wala pa makumpleto ang bahakhak ni King tungod kay may balita nga ang customs mopabayad gyud niya sa ensaktong buhis.

Usa pa sa kahibudngan nato nganong si King ang nangusog nga ma-release ang kargamento nga ang consignee niini mao man ang Philippine International Trading Corp.

Kun tinuod ang report nga wala kini magbayad sa saktong buhis, aduna diay smuggling nga nahitabo?

Kinsa man ang nag-broker niini angayang silotan.

* * *

SALCON. Ang tagdumala sa SPC Power Corp. naglibog nganong nakapanghimakak ang lider sa union sa maong kompaniya pagtug-an sa matuod niyang suweldo sa dihang gipangutana sa mga sakop sa media.

Dili matago ni Gaudioso Iso ang matuod nga suweldo nga iyang gidawat sa SPC tungod kay adunay payroll nga dili mahimong matuis.

Si Iso misugilon sa mga sakop sa media nga mi-cover sa dihang miduaw ug nagpatabang kang Mayor Valdimar Chiong sa Naga City ang mga sakop sa Salcon Power Independent Union (SPIU), nga P40 mil lamang ang iyang suweldo.

Apan ang rekord sa SPC nga naabot sa atong lamesa, nagpakita nga si Iso nagdawat diay og P45 mil, wala pay labot sa P5 mil niya nga allowance. Wala pa kini labot sa 13 month pay, cash gift ug mga bonus.

Unsa man diay tuyo sa union nga gipanguluhan ni Iso?

Paglingla sa publiko sa matuod nga sitwasyon diha sa SPC ang gibuhat ni Iso nga pagtago sa kamatuoran nga hilabihan diay nila kahayahay tungod sa kadagko sa gidawat nilang suweldo, bisan sa ilang pagsamoksamok sa kompaniyang nagbuhi nila.

Kun tan-awon ang salary range sa SPC nga P45,916.76 ang gidawat matag bulan, hilabihan kadako ikomparar sa standard unta nga dawatonon sa yanong rank-and-file nga empleyado sa ubang mga kompaniya.

Nagsugod ang kagubot sa SPC sa dihang gihimo ang certification election unya midaog ang SPIU nga gipanguluhan ni Iso. Adunay legal question nga gisang-at sa Department of Labor and Employment batok sa SPIU, apan inay maghulat kini, misang-at na hinuon kini og notice of strike.

Maayong masayod si Iso ug iyang mga kaubanan sa SPIU nga walay nindot nga ikadulot ang strike. Dili gyud na maoy sulbad sa problema.

Pila na ka kompaniya ang nasirhan tungod sa strike? Pila ka libo ang mga empleyado nga nawad-an og trabaho tungod sa strike?

Nasayod ko nga dili buot si Iso ug iyang mga kaubanan nga isakripisyo ang P50 mil matag bulan nga suweldo alang sa walay hinungdan nga strike.

Kun akoy miyembro sa SPIU mobalhin ko union, kanang dili hingaway sa management nga maoy naghatag og suweldo. Kay kun ingon kapala-away sa management ang akong union, moabot ra ang adlaw nga hikulban ko sa kaldero ug magutman ko ug ang akong pamilya.

Ang maayo ninyo, sabot-saboti na ang inyong suliran sa laing pamaagi tungod kay nagtuo ko nga adunay alternative mode of dispute resolution, dili ang strike.

* * *

BUWANGAN. Sa tibuok nakong kinabuhi, kagahapon pa gyud ko makasulod og buwangan ug nakakita og aktuwal nga pinanitay sa mga manok diha sa ruedahan.

Dili pa tungod sa akong kumpare nga si Mario Bitang, uban sa iyang korporasyon nga D’ Bizprens sa Pasil nga sila si Francisco de Gracia Jr. ug Engr. Renato “Boie” Camacho, dili ko makasulod sa Mahayahay Cockpit sa Carlock-Tupas.

Kamong mga classmate sa buwangan, sulnga ninyo ang Mahayahay Cockpit tungod kay makita ninyo ang kausaban sa maong buwangan nga gipatuman sa bag-ong management, ang D’ Bizprens.

Paingon sa limpyo nga buwangan ang Mahayahay Cockpit tungod kay ang akong sidekick nga si David Rodrigo nagkanayon nga ubos sa miaging management, hilabihan kahugaw sa maong buwangan ug kagahapon nakita niya ang dakong kausaban.

Ako ug si Mam Julie Abejo, kapikas ni kanhi Kagawad Ronnie Abejo sa Pasil, nga pareho nako giimbitar usab sa pagtambong sa opening salvo sa cockpit ubos sa bag-ong nagdumala, nagtupad sa lingkoranan nga nahubog sa alingugngog nga singgit sa mga sugarol.

Usa ka sugarol akong nadunggan miingon nga layo ra kaayo ang dagway kaniadto sa maong buwangan ug sa karon, nga matud niya makakompetensiya na sa mga buwangan sama sa Tabunok.