Ngano kaha no?

Nindot kaayo ang tinguha sa pagtukod og skywalk diha sa Imus Avenue duol sa eskena Sikatuna, apan pagka karon mora’g walay kapuslanan.

Abi ninyo og ngano? Ang mga tawo magsigi man lang gihapon og labang sa karsada nga dili moagi sa skywalk. Walay namadlong sa maong mga tawo, ilabi na ang mga bata.

Peligro kaayo nga sila madam-agan og mga sakyanan. Nagsalig man god sila nga “stop” ang signal alang sa mga sakyanan nga mosubay sa Imus Avenue mao nga manglabang ra sila sa karsada.

Apan peligro gihapon kay dunay mga sakyanan nga gikan sa Sikatuna – dapit sa Zapatera — nga mo-left turn paingon sa Imus Avenue. Ang mga drayber mapugos gihapon sa paghunong aron dili madam-agan ang manglabang.

Resulta niini, makabalda kini sa dagan sa mga sakyanan pareho sa sagad nako nga mabantayan. Usahay dili pa mahurot pag-left turn ang mga sakyanan gikan sa Sikatuna unya mo-Go na ang signal sa mga sakyanan para sa Imus.

Kay nagbabag pa man sa karsada ang mga sakyanan nga mo-left turn paingon sa Imus gikan sa Sikatuna, malangan ang mga sakyanan nga mosubay sa Imus Avenue ilabi na kadtong mopaingon sa P. del Rosario Street.

Unsaon man usab god nga daku mang binuang ang pamaagi sa pagbutang nila og hagdan sa maong skywalk. Tag-usa ra ka hagdan ang gibutang sa matag tumoy niini.

Kun diha ka habig sa T. Padilla unya mopaingon ka sa Zapatera nga mosubay sa skywalk, kinahanglan ka pang molakaw og mga 40 ka lakang usa ka makasaka sa hagdan kay tua man kini sa pikas.

Ambot unsay rason sa DPWH nga wala man nila giduha ang hagdan sa skywalk diha sa habig sa T. Padilla? Gipalabi ba ninyo ang mga tindera aron dili sila mapapahawa sa maong dapit?

Awhagon nako si Engr. Nicomedes Leonor nga tan-awa kuno kun unsay sitwasyon. Kun kwatro milyones pesos man gani ang kantidad sa maong skywalk, mahal ra kaayo kini.

* * *

Dalaygon g’yod kaayo si Kongresista Benhur Salimbangon uy, ang kongresista namo sa ika-upat nga distrito sa Sugbo. Wala g’yod masayop ang akong mga paisano nga mipili ni Benhur.

Ang akong katagi-lungsod sa San Remigio makapahimulos na g’yod sa mga health services.

Gawas sa paghatag niya og libre nga health cards sa mga lumulopyo sa among distrito aron magamit kun sila masakit ug ma-ospital, karon lain na usab ang iyang project.

Kun mahitabo nga mamatay ang mga pasyente, pagahinan na usab niya og burial assistance ang kabanayan sa namatay. Ang budget niini ipaagi sa Department of Social Welfare and Development.

Matud sa spokesman ni Benhur nga si Engr. Greg Senining nga kun bata ang mamatay, ang iyang tagtungod makadawat og P2,000. Kun dili na bata, P3,000. Maayo na lang uy.

Ang pagpirmahay sa kasabutan bahin niining maong project tali kanila ni Benhur ug sa kadagkoan sa DSWD himoon ugma sa buntag anha sa usa ka kan-anan sa Gorordo Avenue.

Mabuhay ka congressman! Daku g’yod ang akong pagdayeg sa mga opisyal nga mohatag og maayong pag-alima sa kahimtang sa panglawas sa ilang mga lumulopyo.

Sama kanila ni Congressman Raul del Mar, ni Mayor Tommy Osmeña ug Ma’am Margot Osmeña. Kabahin ni Ma’am Margot, bisan dili siya opisyal sa gobyerno, apan dili mobalibad kun pangayoan og tabang, basta mahimo lang niya.