Political will

Nindot kaayo kun panghawanan sa mga kawani sa City Hall ang daplin sa karsada diha sa Pier 3 aron magamit kini sa katawhan ug dili kay pahimuslan lang sa pipila ka tawo, apil ang mga shipping companies.

Gipakigtagboan na diay ni Gerry Marquez ang maong mga tindera ingon man ang tagdumala sa usa ka ticket booth sa shipping company ug sila giawhag nga biyaan ang maong dapit.

Pagka  karon god, ang aseras sa ganghaan sa Pier 3 napuno sa mga sidewalk vendors ug sa pipila ka shipping company nga nagbutang og ticket booth sa maong dapit.

Bisan pa og magbayad pa og arkabala ang maong mga tindera sa pag-estar nila sa maong dapit, dili kini igo tungod kay masabot nga nakabentaha sila unya daghan ang mogamit unta niini nga dili na hinoon makagamit.

Hilabihan man god ka “busy” sa maong dapit kay unsaon nga gamay na lang kaayo ang dapit nga magamit sa mga sakyanan.

Ang mga tawo nga anha unta sa aseras moagi, adto na man lang sa karsada maglakaw kay giukopar man sa mga tindahan ang sidewalk.

* * *

Tan-awa ra god ninyo ang eskena D. Jakosalem ug Osmeña Boulevard nga gihawanan sa mga tindera og imahen, nindot na kayo tan-awon. Sa laktud hapsay na kaayo.

Nahimo kini kay si Mayor Tomas Osmeña mipakita na g’yod og political will bisan pa man sa awhag sa pipila niya ka suod sa City Hall nga iangan-angan usa ang pagpalayas sa maong mga vendors.

Diha ko midayeg ni Tommy. Dugay g’yod hinuon kaayo apan sagdi lang, total hawan na man usab. Ang mga tindera nga apektado sa maong demolition, naninda man gihapon apan tago-tago ug dagan-dagan na.

Mao na diha ang pagtulon-an. Dili gani kamo mopatoo sa ilatid nga lagda, moabot ra g’yod ang higayon nga magmahay mo.

* * *

Gitaktak sa Ombudsman ang municipal assessor sa Argao kay namatud-an kuno nga sad-an sa pagdawat og kwarta gikan sa usa ka taxpayer nga buot magpatabang pagparehestro sa iyang yuta, apan wala g’yod matuman.

Maayo unta og mahimo kini nga pagtulon-an sa ubang kawani sa kagamhanan.

Hinuon, ang hingtungdang kawani sa kagamhanan makahimo pa sa pagkwestyon sa hukom sa Ombudsman pinaagi sa pagdangop sa Supreme Court, apan mao lagi, molungtad pa og dugay.

* * *

Kun ako ang kuhaan og pamahayag, mas nindot g’yod nga si RTC judge Geraldine Faith Econg maoy mopadayon sa paghupot sa kaso nga parricide nga gipasaka batok ni cult leader Ruben Ecleo Jr.

Haum kaayo si Judge Econg nga mohupot sa maong kaso kay dili kini mahadlok nga mokasaba og abogado nga magligoy-ligoy sa ilang trabaho aron mopaspas ang dagan sa kaso.

Apan hinuon, mas maayong itataw usab ni Judge Econg kun nganong hangtud karon wala pa siya makahukom kun angay ba, o dili, nga ibalik si Ecleo sa prisohan karon nga piskay na ang iyang panglawas.

Sa una god, ang rason sa mga abogado ni Ecleo sa pagpangayo nila og pagtugot nga makapyansa ang ilang kliyente mao man nga masakiton kuno kaayo si Ecleo.

Apan karon, gitataw sa doctor nga naghiling ni Ecleo nga lig-on na ang iyang panglawas ug walay peligro kun ibalik siya sa pagtanggong sa prisohan.