Kompiyansa

Ang kompiyansa dili lamang makaangol, makapatay usab kini. Daghan na ang naangol ug namatay gumikan sa kompiyansa. Gikan sa ubos ngadto sa taas nga hut-ong sa atong katilingban daghan na kanila ang napagan gumikan sa kompiyansa. Kasagaran sa nasugapa tungod sa kompiyansa mao ang mga sakop sa atong kapolisan. Sama sa mga sakop sa Cebu City Police office nga napatay human bunali og binogha sa giingong adunay suliran sa utok. Dili hinoon ang binogha maoy nakapatay kun dili ang armas nga nailog ug gigamit sa pagpusil ngadto kanila. Ang kamatayon sa usa ka police awardee wa nako ikonsiderar nga kaso sa kompiyansa kun dili kaso kadto sa pabaya kay nakatago man siya apan huyang lang iyang gitagoan, mao pod ang kaso sa police nga nagtubag og alarma didto sa Inayawan. Sa kaadlawon sa Domingo didto sa dakbayan sa Mandaue lain na usab nga police ang napatay ug naangol tungod na pod sa kompiyansa. Ang pagkaangol ug pagkamatay bunga sa pagkompiyansa human kini mitubag og alarma sa tulis. Sa matang sa trabaho sa police nga kanunay nga gikuyogan sa ka risgo sa kinabuhi dili gyod unta hatagan niini og kahigayonan nga makapabantang ang kompiyansa aron mahilayo kini sa disgrasya.

Kaingon ko ba kun nakat-on na ang atong mga police sa nahitabo niadtong police nga napatay kay gibonalan og binogha, wa man diay gihapon.

* * *

Ang kamatayon ug ang pagkaangol sa lain pang usa ka police sa dakbayan sa Mandaue makapahigmata na unta kini sa mga opisyal sa nahisgutang dakbayan nga nagsige lang og away tungod sa politika. Ihatag na unta niini ang suporta nga dapat ug angayan lamang ihatag ngadto sa mga police nga nadistino sa Mandaue. Ipadaplin na unta nila ni Mayor Cortez ug Fortuna ang lalis sa politika ug maoy atimanon ang panginahanglan sa atong kapolisan. Sa ka dakong dakbayan sa Mandaue dili ni kahatag og bisan unsa nga magamit sa atong kapolisan?

* * *

Saludo ko sa hukom ni Mayor Tomas Osmeña pagdili sa mga piniriso sa Cebu Provincial Detention and Rehabilitation Center sa umaabot nga Sinulog Grand Mardigras kini bisan pa man og dili ko segurado sa tinooray niyang rason - ang seguridad ba o ang iyang bangi ngadto sa gobernador. Tungod sa seguridad sakto ra ang hukom sa mayor. Dili ta gusto nga atong isakripisyo ang kaseguroan sa mga langyaw ug mga tumatan-aw sa nabantog na sa kalibotan nga sayaw sa mga piniriso sa CPDRC. Wa koy pagtoo nga ang mga piniriso mosibat atol unya sa ilang pagsayaw sa Sinulog tungod kay ang pasayawon kadto man lang hapit na mahuman ang ilang sentensiya, ang akong gikabalak-an nga mao unyay makamugna og kagubot mao kadtong mga kabanay sa mga nabiktima sa maong mga piniriso nga nagdumot kay basin dumugon unya sila niini samtang sila nagsayaw. Dili sa ingon nga atong gipakaubos ang mga piniriso sa atong pagsupak sa ilang pagsayaw, naneguro lang ta.