Unsay kalahian nilang Trillanes ug Honasan

Daghan ang nakapanghinaway sa gibuhat ni Senador Antonio Trillanes IV nga pagsulod sa Manila Peninsula Hotel sa Makati uban ni Brigadier General Danilo Lim ug kanhi Bise Presidente Teofisto Guingona.

Nakapangutana ang mga nakasaway sa gibuhat ni Trillanes nga wala na lang ba gyud siyay mahimo sa iyang kaugalingon aron lang madungog ang iyang kawsa gawas sa pagpangilog og hotel.

Si Trillanes maoy usa sa mga aktor niadtong napakyas nga munity sa Oakwood Hotel sa Makati, uban sa mga sakop sa Magdalo group.

Walay dili makasaway sa gibuhat nilang Trillanes, Lim, Guingona ug mga sakop sa Magdalo sa dihang ilang gisulod ang Manila Pen. Usa ko sa nakasaway sa ilang gibuhat tungod kay ang tagdumala sa hotel ang nahan-okan sa tanang kahasol, alkanse ug kahadlok sa presensiya sa mga rebelding sundalo.

Kutob ra gyud kita sa pagpanaway.

Ang wala nato mahimo mao ang paghinuktok nganong naingon niini si Trillanes.

Si Trillanes gipili sa 11 milyones ka mga Pilipino isip senador sa atong republika, apan ang Senado kang kansang liderato kontrolado sa Malacañang nagdumili sa pagpalingkod niya ug pag-apil sa mga sesyon ug ubang kalihukan sa mga senador.

Unsay kalahian ni Trillanes ug Senador Gringo Honasan?

Si Honasan ug Trillanes, sama sa ubang 22 ka senador, gipili sa mga tawo aron molingkod sa Senado.

Si Honasan ug Trillanes parehong nag-atubang og kasong rebelyon.

Pareho sila nga gigukod sa administrasyon ni Arroyo.

Pareho sila nga mikandidato niadtong 2007 nga senatorial election.

Pareho sila nga walay mga budget paigo nga makatuyok ang ilang makinarya atol sa kampanya.

Pareho sila nga walay klaro nga kampanya.

Si Honasan gitugotan nga makagawas sa prisohan aron makapangampanya, apan si Trillanes gipugngan ang mga lihok mao nga wala gyud siya makapangampanya.

Apan pareho silang midaog. Ang ilang kadaugan parehong wala makasugat og kakulian.

Pareho silang senador, apan si Honasan lamang ang gipalingkod, si Trillanes wala gyud.

Klaro kaayo ang double standard niining atong republika.

Kinsa nga Trillanes ang dili maaburido? Nga ang tinguha niyang pagserbisyo sa mga Pilipino aron dili niya mapakyas ang 11 milyones nga mibotar kaniya, wala na man gyuy kapaingnan.

* * *

TAXI. Ang kapait sa mga PUJ ug taxi driver dili usab diay hitupngan subay niining nagpadayong pagsaka sa presyo sa petrolyo.

Ang kinabuhi sa mga drayber og PUJ ug taxi daw sama sa ngipon nga nagbitay na lang sa gamay nga tipik sa lagos nga kun imong tarugon matagak kini sa tumang kasayon.

Si Eddie nga nagmaneho og taxi sulod sa lima na ka tuig miasoy kanako nga sa higayon nga ma-short kun maalkanse gani siya sa iyang boundary tungod sa kamingaw sa mga pasahero pun-an pa sa kamahal sa gasoline, makapanghulam gyud siya aron ilang itapak sa alkanse sa abang kon boundary.

Dinhi nako nahibaw-an nga samtang makaluluoy kaayong nagkayod ang mga taxi driver, ang ilang operator ang nabulahan pag-ayo.

Ang mga operator modawat lang og limpyo nga abang gikan sa P900 ngadto sa P1,200, samtang usahay mouli ang taxi driver nga P20 o P50 ra ang kuwarta.

Kun gipangayo man nato ang pag-review sa oil deregulation law, maayong pangayuon usab sa mga drayber nga may balaod nga mapanday ang mga magbabalaod aron magprotehir nilang mga drayber batok sa mga abusadong mga operator.

Gawas nga dili mosugot nga short ang boundary nga i-remit, sila pa gyud ang magbuot asa magpatubil og gasoline o LPG, ug asa nila pahugasan ang ilang mga taxi units.

Ang maong balaod unya alang nilang mga taxi drivers magseguro usab nga aduna silay mga benepisyo nga madawat gikan sa ilang pagpang-empleyo, ug kinahanglang ipamiyembro sila sa SSS ug Philhealth.

Sa pagkakaron, ang mga operators ang misamot og kadato, samtang misamot ka-ut-ot ang mga taxi drivers ug ang mga PUJ drivers.

Samtang nagpakadato sila, ang pangutana kun nagbayad ba sila sa husto nga buhis  isip operators.

Karon nga nag-atubang ang kagamhanan sa mga reklamo nunot niining pagmahal sa presyo sa mga produktong petrolyo, maayong tan-awon usab nila ang mga butang nga naka-apekto sa industriya sa lana, sama niining kinabuhi sa mga drayber ug operator diin magdepende ang dagan sa ilang negosyo.