Ayaw’g palab-ani ha

Ang pagbutang og “courtesy booth” sa mga department store diha sa aseras dili gayod maayo kay makapasamot kini sa kasamok.

Kini usab maoy rason nga misamot ang panagsungi nila ni Gerry Marquez, ang consultant ni Mayor Tomas Osmeña alang sa urban poor ug ni Major Vicente Mercado nga maoy hepe sa City Hall demolition team.

Buot ni Mercado nga tangtangon g’yod ang maong courtesy booth ug natuman g’yod kini sa nangaging mga buwan. Apan diha’y higayon nga nabantayan ni Mercado nga gibalik na usab kini pagbutang diha sa aseras.

Diha-diha, gipadad-an ni Mercado og tulo sa iyang mga sakop ang maong dapit aron kuhaon ang maong binlanan sa mga butang sa customers sa tindahan, apan gipakita sila sa usa ka “note” nga giisyu ni Marquez.

Basi sa “note” ni Marquez iyang gitugotan ang Unitop diha sa eskena D. Jakosalem ug Osmeña Blvd. nga mapahimutang og “courtesy booth” sa aseras. Aw hinoon, gitan-aw man kini nako gamay-gamay na kini’g dyutay kay sa ilang courtesy booth kaniadto.

Apan ang maong lugar gud dili g’yod unta angay’ng butangan og courtesy booth kay makabalda kini sa pag-agi sa mga tawo, ilabi na nga ang maong dapit maoy agianan sa mga manimba sa Basilica del Santo Niño matag Domingo.

Nahimutang karon nga walay dag-anan si Mercado kay si Marquez maoy gilabanan sa mayor. Girekomendar pa gani ni Marquez ngadto sa mayor nga kadtong tulo ka sakop ni Mercado nga mitangtang unta sa courtesy booth dili na renyohan sa ilang kontrata.

Gipasabot ko ni Tommy nga gihatagan lang niya’g gamay’ng konsiderasyon ang tag-iya sa building nga giabangan sa Unitop kay sukad god kuno nga gibiyaan kini sa City Hall kaniadto, wala na gyoy miabang niini.

Ang maong building nga giabangan karon sa Unitop maoy gigamit nga opisina kaniadto sa Assessors Office sa dakbayan sa wala pa mahuman ang City Hall annex building.

Aw buyno, kun ako’y kuhaan og baruganan, pananglit tugotan ang Unitop nga makabutang sa ilang courtesy booth diha sa aseras apan kinahanglang dili kini molapas sa haligi aron dili makabalda sa mga lumalabay.

Sigurado man god nga samok kaayo ang maong dapit, ilabi na karong nagsingabot ang Pasko ug Bag-ong Tuig, ngadto na kini sa Fiesta Senyor kun anaa sa aseras ang courtesy booth, ilabi na og palapdan kini sa Unitop.

Awhag nako nila ni Gerry ug Major Mercado, hunonga na kanang inyong panagbingkil kay Pasko na. Maayo pa’g magkuyog ta og manganta. Okey mo? Wala ni’y personalan ang ato, trabaho lang.

* * *

Si Kongresista Benhur Salimbangon sa Cebu’s fourth congressional district ug si Kongresista Raul del Mar sa Cebu City north district parehong nag-awhag sa ilang mga lumolupyo nga magpabiling kalma taliwala sa kagubot didto sa Manila.

Husto sila nga kinahanglang dili kita mag-apil-apil sa tinguha sa grupo nilang Senador Trillanes. Matud ni Sir Benhur nga moapil ta sa pagpaniid sa panghitabo sa kaulohan apan kinahanglang dili kita magpabalda sa atong mga trabaho.

Mao kini ang rason nga kanunay g’yod ko nga modayeg aning duha ka kongresista kay managsama sila og kawsa – ang pagtabang sa mga kabus pinaagi sa paghatag kanila og pag-atiman sa ilang maayong panglawas.

Padayon mong duha sa mga dalaygon ninyong kalihukan pagserbisyo sa katawhan. Kining matanga sa mga tawo maoy angay’ng ibutang kanunay diha sa atong kagamhanan.