EDITORYAL – Tumanon unta ang gisaad

Ang atong mga magtutudlo gisaaran nga hatagan sila’g P2,000 nga honorarium sa duha ka adlaw nilang pagserbisyo atol sa bag-o pang gipahigayon nga barangay ug Sangguniang Kabataan (SK) eleksiyon.

Apan unsay nahitabo? Ang maong P2,000 nga honorarium gipaubsan ngadto nalang sa P1,000 kay ang kuwarta nga gipagawas sa Department of Budget and Management para ra man sa maong kantidad nga honorarium.

Gidepensahan kini sa Comelec kinsa miingon nga dili angay moreklamo ang mga magtutudlo kay honorarium ra man ang gisaad ngadto kanila.

Maayo untag saad ray gihimo sa Comelec diin way kantidad nga gihisgutan. Apan dunay numero nga gipasalig ug ang maong numero kon kantidad mao untay tumanon. Ang saad, saad. Ug kinahanglan nga ang saad tumanon.

Respetohan unta ang saad. Ug respetohan usab unta ang atong mga magtutudlo nga gisaaran.

Gimenosan ba lang ang DBM ug Comelec sa atong mga maestra ug maestro?