EDITORYAL – Vote buying usa na ka kultura

Malinawon ang piniliay niadtong Lunes. Hayahay, literally, ang polis. Way dagkong kasamok nga nagkinahanglan og makapasingot nga aksiyon sa kapolisan.

Apan ang pagpinalitay sa botos maoy naghari kun atong tuohan ang mga reklamo sa daghang mga botante ug mga kandidato.

Kining pinalitay sa botos lisud na kini nga mapapas sa sistema sa atong eleksiyon. Nahimo na kining usa ka kultura nga gisabak na sa atong mga politiko ug sa ilang mga gingsakpan.

Bisan gani sa pipila ka kampo sa kabatan-onan nga nalambigit sa eleksiyon duna say mga gireklamong namalit og botos alang sa ilang mga kandidato.

Hangtud nga walay modokumento ug mobarog gayud sa ilang reklamo, kining pagpamalit og botos atol sa eleksiyon magpadayon gayud ug wala gyuy mahimo ang Comelec sa pagpahunong niini.