EDITORYAL - Ang mga pasalig di kalimtan

Human na ang eleksiyon. Ang mga botante nakapili na sa mga opisyal nga buot nilang pakupton sa renda sa pangagamhanan sa masig nila ka barangay.

Hinaut unta nga kadtong mga nangapili motuman sa ilang mga saad ug pasalig ngadto sa mga kaayuhan sa barangay kanunay nilang ipatigbabaw.

Manghinaut usab kita nga ang mga taga-barangay, botante man o dili, mohatag sa ilang kooperasyon ngadto sa mga nangapili nilang opisyal bahala nag kapartido nila kini o dili.

Bisan unsa ka maayo ang usa ka opisyal sa barangay kun kini walay kaabag nga madawat gikan sa katawhan dili gayud magmalampuson.

Human na ang eleksiyon. Kalimtan na ang panagbangi. Ang kaayuhan sa atong barangay mao nay hunahunaon ug ipatigbabaw.