EDITORYAL – Naunsa na man ni sila?

Nagkadaghan nang mga kaso sa kriminalidad diin nalambigit ang pipila ka mga sakop sa puwersa sa atong kapolisan. Naay mga nalambigit sa tulis ug extortion kun pagpangilkil.

Ang labing ulahing kaso sa extortion anha pa gyud gani nahitabo sud sa usa ka buhatan sa kapolisan diin mga ahente sa NBI maoy nakasakop.

Ang kasagaran ta nga madungog sa atong concerned citizens kun nagpakabanang lungsuranon mao kining pangutana: Naunsa na man ni silang mga tinugyanan ta sa pagpasunod sa balaod?

Panahon na nga limpiyohon ang kapolisan dili lang dinhi sa ato kundili usab sa uban dapit sa nasud. Ang mga sad-an nga polis silotan.

Uyon kami sa giingon ni Executive Judge Fortunato de Gracia nga ang mga badlongon nga polis dili lang ibalhin sa laing lugar kundili paphaon gyud sa serbisyo. Kay unsaon man tuod paglimpyo sa kapolisan kun anaa ra gihapon sa serbisyo ang mga naghugaw-hugaw sa ngalan sa PNP?