Bag-ong modus

Niining bahina sa akong lindog, akong hatagan og pagtagad kining text sa usa nato ka magbabasa nga gustong mohatod og kasayoran kalabot sa bag-ong estilo sa modus operandi sa mga snatcher og cellphone. Nahukman nako nga ipatik ang katibuk-an sa iyang text aron inyo gyung masabtan ang tanan.

Ang iyang text nagkanayon: “Ang bag-ong modus karon sa mga snatcher og cellphone ingon niini ang estilo. Duolon ka nila unya ingnon ka nga ikaw usa ka snatcher. Sa ato pa, ilang ipahid diha nimo ang ilang binuhatan. Unya manawag dayon sila og police. Inig-abot sa police ikaw ang itudlo sa mga snatcher nga ikaw ang nag-snatch sa ilang cellphone. -- 0920-4955074 (11:25:19am-- July 7, 2007)

Usa kini ka dakong binuang. Tiaw ba nga ang tawo nga wala magbuhat og daotan mao na man hinuon ang dakpon kay siya man ang iduot sa mga snatcher. Pastilan! Pait kaayo. Pagbantay kamo niini. Dili man tuod kamo mabiktima sa pangisnats apan demalas sab kaayo kay kamo man ang mapasanginlan nga nagisnats kay ang mga snatcher man mismo maoy magduot kaninyo ngadto sa kaalaotan. Kamoy ilang pahiran sa salaod nga ilang nahimo. Among-among kining ilang gihimo.

* * *

Sa laing bahin: “Good day. Unsaon na man lang ang drug problem sa Lamac, Consolacion? Ang nagpaluyo niini usa ka police. Hantak ug drugs nagkagrabe na. Siyarog wala makaabot sa dalunggan sa hepe ang ilegal nga buhat diri sa Lamac?” -- 0920-7102415 (07:09:40am-- July 9, 2007)

Sensitibo kining gihatag nga kasayoran sa atong texter. Gipatik nato kining iyang text, dili tungod kay mituo ta sa iyang alegasyon. Gipatik ta kini aron pinaagi niini masayod ang hepe sa kapolisan sa Consolacion nga nagkagrabe diay ang payuhot sa ginadiling drugas ug sugal nga hantak diha sa Lamac, Consolacion. Basin diay kun wala pa gayod makaabot sa mga dalunggan sa hepe kining maong kasayoran. Angay niyang susihon kun aduna ba gyoy polis sa Consolacion nga maoy nagpaluyo sa kalihokan sa sugal ug payuhot sa drugas diha sa Lamac.

* * *

 (Sumbong ug reklamo? Text sa 0910-8105522)