Argumentong baliko

Klaro kaayo nga ang mga opisina sa kagamhanan dili “exempted” gikan sa pagkuha og permiso kun magtukod sila og mga infrastructure projects, sama sa skywalks, building, ug uban pa.

Apan subo lang nga daghang mga opisina sa kagamhanan nga mibaliwala lang niining maong lagda nga gilatid diha sa National Building Code. Ang uban mihulagway niini nga wala na tahura pa ang Office of the Building Officials.

Hinuon, usahay makaingon ko nga husto ra usab nga dili tahuron kining taga OBO kay igo ra g’yod sila sa “compliance” apan kuwang og “enforcement” kay daw wala sila’y ngipon nga ikapaak sa mga masinupakon sa balaod.

Kinsa god tawo’y morespito kanila kon ingon niana ang ilang batasan nga kun dunay makalapas sa lagda nga gilatid sa National Building Code, daw sa wala lay nahitabo.

Mao na nga daw sa giyaga-yagaan lang sila sa taga Department of Public Works and Highways (DPWH) nga wala g’yod mahinumdom pagkuha og permiso kanila sa pagmugna og mga skywalk dinhi sa dakbayan.

Kun miagi pa ang DPWH sa OBO sa wala pa nila sugdi pagtukod ang flyover diha sa Imus Avenue, hayan – kun dili magduka ang taga OBO – makita unta nila ang pipila ka palpak niini.

Una, ang pagbutang sa skywalk diha sa Imus Avenue aron nga ang mga molabang sa maong karsada dili na makabalda sa dagan sa mga sakyanan, makapawagtang na hinoon sa aseras tungod sa skywalk.

Nakakomedya god si Vice Mayor Mike Rama nga “gimugna kuno ang skywalk aron sa pagwagtang sa sidewalk.”

Unsaon nga ang tiilan sa skywalk anha man mobarug sa sidewalk, sa ato pa ang mga tawo nga nagsubay sa sidewalk, mapugos sa pagkanaug ngadto sa karsada ug kun dili magbantay, maligsan sila sa mga sakyanan kun danghag usab ang mga drayber.

Balikan nato ang sayop nga interpretasyon sa taga OBO. Kun may magtukod kuno og building nga walay permit, unya kun mahuman na, molukat na lang, dili diay “violation?”

Klaro baya kaayo diha sa balaod nga gidili g’yod ang pagtukod og mga building nga dili magkuha daan og permit. Naa diay diha nga kun molukat na lang og permit sa kauwahian, wala nay multa?

Kabaliko god nianang inyong mga interpretasyon?

* * *

Daw sa nahutdan na sa pailob ang akong amiga nga si Raquel Arce nga makakolekta pa sila og abang gikan sa mga tawo nga miukopar karon sa kanhi Warwick barracks market – tupad sa nabantog kaniadto nga Freedom Park.

Kun mga tawo pa kining duha – ang Warwick Barracks ug Freedom Park – maayo ni silang pakungon. Ang Warwick Barracks dili na merkado kay gihimo na nga pinuy-anan, samtang ang Freedom Park dili na parke kay pulos na mga tindahan.

Matud ni Raquel nga ang mga nagpuyo sa Warwick Barracks dili na gayod mamayad og abang mao nga kay gipul-an na sila, ang ilang gikolektahan mao na lang ang mga tindahan sa daplin sa karsada.

Isip reporter sa The Freeman sa City Hall, kanunay kong magsuroy-suroy ug nasigpatan nako nga ang kanhi merkado,  nahimo na karong mga pinuy-anan ug ang kaniadto tindahan, karon mga balay na.

Sa Freedom Park, si Mayor Soc Fernandez nga kaniadto anha sagad makigdebate sa mga representante sa lainlaing relehiyon kay usa man siya ka Catholic Faith Defender, dili na makatultol kun diin tong lugara nga siya kanunay’ng modiskurso.

Salamat diay ni Raquel kay mora’g maayo niya nga pagkadumala ang kamerkadohan, tungod niini misaka ang koleksyon gikan sa P16.7 milyones sa unang tunga sa tuig niadtong 2006, ngadto na sa P18.6 milyones karong tuiga.