Ang way batasan nga yahoo

Giguba sa yahoo.com ang akong adlaw. Inay kay akong gi- save ang akong item nga balig usa ka oras ug tunga nakong gi- encode sa wa pa nako kini i-send nag cannot be displayed hinuon ang koronto, resulta halos wa na koy nahinumduman sa tanan nakong na encode tungod sa kalagot. Bahalag masuko ka nakong yahooha ka basta sultihan tika sa tinuod nga wa kay batasan. Sayonan kang imong gisakit-sakit ang akong ulo ug gipadoble pa gyud nimo ang akong bayranan sa internetan. Gawas niana gihago pa gyud ko nimo pagmaayo! Gipasanginlan pa ko sa akong asawa nga nakig-chat og laing babaye tungod sa kadugay nakong nauli. Joke joke joke. Pero sa pagkatinood, wa gayoy batasan ning yahoo.com.

* * *

Kuhaon na sa probinsiya sa Sugbu  ang luna nga iyang gipanag-iya diin dinhi nahimutang ang Central Command apil na ang gihimong military reservation area nunot sa pagbalhin na sa Cental Command didto sa dakbayan sa Lapu-Lapu. Tungod niini gibana-banang walo ka libo ka mga molupyo sa maong dapit ang maapektuhan ug papahawaon sa mga luna nga ilang gitarokan og balay nga kapuy-an. Gumikan niini miinit na usab ang panagbangi ni Mayor Tomas Osmeña ug Governor Gwen Garcia. Ang mga apektadong molupyo giduphan sa mayor pinaagi sa paghatag og abogado nga maoy mangabogar kanila kun ugaling ikiha kini sa probinsiya. Mopalabang usab ang konseho sa siyudad og rezoning ordinance aron dili magamit sa probinsiya ngadto sa laing katuyoan ang luna gawas lamang sa socialize housing. Apan determinado gayod ang probinsiya nga mokuha sa maong mga luna. Ang duha ka tag-as nga opisyal sa siyudad ug probinsiya sa Sugbu pulos namahayag nga ang ilang gihimo, mao lamang ang pagpanalipod sa ilang mga constituente. Kun mao, dili na angayan pang magpasakitay si Tomas ug Gwen kay ang ilang tuyo mao man kaha ang pagpanalipod sa ilang mga constituente.

Ang gobiyerno gimugna aron panalipdan ug tabangan ang katawhan alang sa mga batakang panginahanglanon niini sama sa paghatag og luna nga matarokan sa balay nga ilang kapoy-an. Gani mamalit pa man ang atong gobiyerno og mga luna aron mahatag ngadto sa mga tawong way kapuy-an. Nganong dili na man lang magsabot ang siyudad ug probinsiya aron masulbad kining maong problema? Walay dili makab-ot sa panagsabot-sabot kana kun matinud-anon lamang ang nanagsabot sa sabot-sabot.

Sigon sa akong nasayran dili lamang mga taga siyudad, aduna usay mga taga probinsiya nga nanimuyo sa maong mga luna. Kun wa ko masayop mga 80 ektarya kining reservation area ug pipila lamang niini ang napuy-an. Nganong dili na man lamang ibaligya ngadto sa mga nag-okupar niini ang maong mga luna ug ang nahabiling bakante maoy gamiton sa probinsiya alang sa industriya ug ubang proyekto alang sa kalamboan? Hinuon kadto lamang mga tinooray gayod nga walay kapuy-an ang tugutan nga makapahimulos niini, walay labot kadtong mga professional squatters nga nagsige og panapi. Kamo pong mga beneficiaries pagtinarong pod mo og bayad ngadto sa probinsiya nianang luna nga gigahin kaninyo. Ayaw mo paghuna-huna nga libre nang ihatag diha kaninyo kay wa nay libre rong panahona.