Drugas ug video karera

Gikan sa cellphone number  0927-3083180: “Good day, Sir. Kanus-a pa kaha masumpo sa kapolisan kining grabeng paghitak sa mga drugas ug video karera diri sa Lopez sa brgy. Calamba, Cebu City? Thanks.” -- 12:43:01pm-- July 6, 2007

Daghang salamat sa kasayoran nga imong gihatag, higala. Atong sangpiton ang atensiyon sa kapolisan aron mahimoan og aksiyon kining imong reklamo. Hinaot unta nga aksiyonan dayon kini sa mga tinugyanan sa balaod aron masuta kun tinuod ba o dili nga naghitak ang drugas ug video karera diha sa brgy. Calamba.

Kun ugaling tinuod  kini, angay tinud-on pagdakop ang mga malapason. Kinahanglang seryosohon ang pagdakop kanila aron makunhoran ang ilang gidaghanon. Among paaboton ang inyong aksiyon, Tsip!

* * *

Bahin na sab sa videokehan: “Sir, mamalihog lang unta kog badlong niining videokehan sa dalan L. Flores sa Pasil. Naa ni sa right side inigsulod nimo sa Flores St. Ikaduha nga tindahan gikan sa eskina Tupas ug L. Flores. Sir, daghan mi diri nga nag-abang, mga estudyante ug mga trabahante. Dili gyud mi makatulog magbuntag kay bungbong ray nakaali sa among giabangan nga balay ug sa videokehan. Naproblema mi niini, Sir, kay wala mi masayod kun asa moreklamo ilabi na kay ang caretaker dili sad taga Cebu.”-- 0916-5505133 (09:23:56am -- July 8, 2007)

Maisip kana nga public nuisance kun ang maong videokehan nakadisturbo ninyong mga silingan. Hinaot unta nga ma-regulate sa tag-iya sa maong videokehan ang gikusgon sa ilang pagpatugtog aron dili makadisturbo sa ubang mga tawo nga gustong matulog ug mamahulay panahon sa kagabhion. Pagbaton og kaikog, Mr. Tag-iya!

Kun dili gyud pahinayan sa tag-iya ang tugtog sa iyang videokehan, mahimong idangop kini ninyo sa barangay ug sa buhatan sa kapolisan. Mahimong mopasaka mog kaso nga unjust vexation batok sa maong videokehan. Mahimo gani nga mangayo mog civil damages niini sa korte. Kini gyud ang angay ninyong buhaton kun ugaling magpaugat ang tag-iya sa videokehan.

 (Sumbong ug reklamo? Text sa 0910-8105522)