EDITORYAL - Ituro ang kinaroroonan ni Pastor Quiboloy
Dapat gumawa ng hakbang ang Philippine National Police (PNP) sa sinabi ni dating President Rodrigo Duterte na alam nito ang kinaroroonan ng wanted pastor na si Apollo Quiboloy. Hindi dapat balewalain ang ipinahayag ni Duterte at magsagawa ng pag-iimbestiga kung may katotohanan ang ipinahayag ng dating Presidente.
Kung totoo ang sinabi ni Duterte na alam niya ang kinaroroonan ni Quiboloy pero hindi raw niya sasabihin, maaakusahan siya ng obstruction of justice. Maaaring akusahan na pinagtatakpan niya ang pinagtataguan ng kaibigang pastor na nahaharap sa maraming kaso kabilang ang sexual and child abuse at human trafficking.
Hanggang ngayon wala pang isinasagawang pag-iimbestiga ang PNP kung may katotohanan ang ipinahayag ni Duterte ukol kay Quiboloy. Ayon sa tagapagsalita ng PNP tinitingnan nila na baka nagbibiro lang ang dating Presidente sa sinabi nito. Gusto raw nilang malaman ang buong context ng mga sinabi ni Duterte bago sila gumawa ng hakbang.
Nakapagtataka naman kung bakit magbibiro si Duterte sa kinaroroonan ni Quiboloy. Bakit kailangang gawin niya ito? Una na niyang sinabi noon na dapat sumunod sa batas si Quiboloy pinayuhan niyang sumuko na ito.
Nang magsisilbi naman ng warrant of arrest ang PNP sa tahanan ni Quiboloy noong nakaraang buwan at nagkaroon ng kaguluhan, sinabi ni Duterte na masyadong marahas ang PNP. Hindi raw dapat nagkagulo at may mga nasaktan pang followers ng appointed Son of God.
Hindi malaman kung ano ang mga totoo sa sinasabi ng dating Presidente ukol kay Quiboloy. Sa halip na magkaroon ng katiwasayan at kaayusan ay nababahiran ng kalituhan. Kung talagang may pagmamahal siya sa kapayapaan, katahimikan at patas na hustisya, ituro niya ang kinaroroonan ni Quiboloy. Harapin nito ang inaakusa.
Hindi na dapat umabot pa sa kaguluhan ang lahat. Hindi na dapat pang isekreto ang kinaroroonan ng pastor.
- Latest
