Operation, way hadlok-hadlok

Ang pagpahapsay sa atong mga karsada – apil na gani ang mga aseras dinhi sa dakbayan – anaa ra g’yod sa kasinsero sa mga tigpatuman sa balaod.

Nasaksihan nako kagahapon ang gipahigayong “clearing operation” sa mga kawani sa City Hall nga gipangulohan ni Gerry Marquez, ang urban poor consultant ni mayor Tomas Osmeña.

Tumong sa ilang clearing operation mao ang pagpahapsay sa mga karsada diha sa palibot sa Basilica del Santo Niño. Pag-abot sa mga sakop ni Marquez, alibwag ang mga naninda sa karsada.

Wala hinoon sakmita nila ang mga baligya, apan ang mga karomata nga gigamit gidala sa City Hall. Dunay ordinansa nga ang mga tag-iya niini, mobayad g’yod og multa isip paglukat sa ilang karomata.

Kun ingon niini ang priming buhaton, siyaro og dili mausab ang batasan sa mga tindera nga anaa na sa karsada maninda.

Ang tinuod, malooy g’yod unta ko sa maong mga tindera apan unsaon nga makahasol man sila sa motorista. Dunay mga motorista kagahapon nga miabiba sa gihimo sa mga sakop ni Marquez.

Akong awhagon ang mga sakop sa SPEED nga gipangulohan ni Vicente Mercado nga mohimo usab sila og susama nga pagpanakop. 

* * *

Karong Lunes, imbintaryohon na ni Marquez ang mga stalls diha sa  D. Jakosalem nga gipagamit nga libre sa City Hall ngadto sa mga tigbaligya og imahen sa mga santos.

Kadtong mga stalls nga gihimo na lang bodega sa mga mapahimuslanong tindera, kay tua sila maninda sa mas pabor nga lugar, bawion sa City Hall ug ipagamit sa mga walay pwesto.

Usa kini ka nindot nga paagi ug lauman nako nga tinud-on g’yod ni Marquez ang iyang gisaad.

* * *

Laing gipasalig ni Marquez nga aksyonan mao ang pagtangtang sa mga “extended” nga tapangko nga gitaud sa mga tindera nga nag-ukopar sa mga stalls.

Ang tinuod, tulo ra ka tuig ang gihatag nga higayon ni mayor Tomas Osmeña nga ang mga tindera makagamit nga libre sa maong mga stalls.

Apan bisan og milapas na ang tulo ka tuig, wala lang gani sila estriktoha, wala gihapon pabayra ug abang.

Unsay ilang gihimo? Miabuso hinoon. Gisumpayan nila og laing sin ang tapangko sa stalls kay aron kuno mosalimbong kanila sa kainit sa adlaw.

Wala pa g’yod makontinto, nagbutang pa g’yod sila og tapangko nga mora’g usa ka metro ang gitas-on gikan sa sumpay na nga atop-atop.

Pwerteng grabeha. Ang mga tawo ari na g’yod mag-agi dapit sa taliwala sa karsada. Tan-awon nako kon kinsa sa grupo nila ni Mr. Marquez ug Mr. Vicente Mercado ang makatangtang aning maong “extended” nga tapangko.

Sa tumoy nga bahin dapit na sa City Hall, duna pa’y gitukod nga laing “stall.” Ang mga sakop sa demolition team nagpiyong-piyong lang tingali kon moagi diha nga mora’g wala makakita.

Ato ra god nga tumanon ang mga lagda aron mahapsay ang atong mga karsada. Sultihan ko kamo, nahitabo pa nga ako’y anaa sa inyong pwesto unya kamo ang media, wala g’yod mo’y ikayawyaw.

Motahud man na ang mga tindera nga dili na moabuso basta kanunayon ninyo ang paghimo og kampanya. Unsaon nga ang kampanya himoon karon, unya sundan sunod buwan.

Salamat kaayo sa inyong gihimo Mr. Marquez kay pinaagi niini, mahawan ang atong karsada bisan sa mao  lang nga panahon.