Ayaw pagtago padre!

Pormal na nga gipasakaan og kaso sa National Bureau of Investigation kadtong pari kinsa gipasanginlan nga mi-molestiya sa pipila ka mga tinun-an sa Abellana National High School atol sa usa ka seminar sa Nobiyembre sa niaging tuig.

Ang pagpasaka sa kaso natigayon human ang NBI nakakita og igong basihan pagkiha ni Fr. Benedicto Ejares human sa gipasakang reklamo sa pito sa 20 ka mga tinun-an sa Abellana kinsa giingong mga biktima sa sexual harassment sa maong pari.

Ambot asang dapita na karon gibutang sa Ginoo si Fr. Ejares. Blangko hasta ang mga mamahayag kon asa na karon na-assign ang maong pari.

Apan karon nga gipasaka na ang kaso batok ni Fr. Ejares, kinahanglan nga mohimo usab og lakang ang mga lideres sa simbahan pagpresentar kaniya ngadto sa korte. Angay mohimo og lakang ang simbahan pag-aghat sa pari nga mopakita sa publiko gumikan kay ang akusasyon nahitabo samtang nagbuhat kini sa iyang opisyal nga gimbuhaton isip alagad sa simbahan.

Hinuon, mora''g luya man ang reaksiyon sa mga opisyales sa simbahan niining pagpasaka''g kaso batok ni Fr. Ejares. Gani, si Cebu Archdiocesan Episcopal Vicar Esteban Binghay mibutyag nga magpaabot na lamang sila sa resulta sa imbestigasyon sa korte. "If a victim filed a criminal case, it''s a criminal case and it now belongs to the court," matud niya.

Subong palandungon nga sa pagbuto sa maong alegasyon batok kang Fr. Ejares, tak-om kaayo ang mga kadagkoan sa simbahan mahitungod niini. Kini nga lakang nakapaduda sa baroganan sa simbahan kalabot niining maong isyu.

Mora na hinuon nga ilang gitabonan ang kamatuoran sa tinuoray nga nahitabo atol sa maong Life In The Spirit seminar. Kini tungod sa pagdumili sa kadagkoan sa simbahan pag-presentar sa maong pari sa mga imbestigasyon. Dili ba kaha nahadlok sila nga basin unya kon sad-an gayud diay ang maong pari?

Usa usab sa nakaporke ning atong kadagkoan sa simbahan mao nga kusog kaayo sila moatake sa mga kapalpakan sa kagamhanan. Gani, usa kanila ang grabe nga nakalapdos sa gobiyerno nga ipagawas ngadto sa publiko ang nagasto niini sa nakalabay''ng ASEAN Summit aron maklaro gayud ang tinuoray''ng budget.

Apan kon ang usa ka pari na gani ang malambigit og anomaliya, hilabihan dayon ka tak-om sa mga baba ning mga lideres sa simbahan, kini aron pagpatay sa kalayo sa kontrobersiya.

Dili matago sa simbahan ang kamatuoran nga ang usa niini ka alagad giakusahan og sekswal nga pag-molestiya, nga usa ka dakong sala ilalum sa lagda sa pagkapari ug moralidad. Ug wala gayuy hustisya nga makab-ot sa kaso ni Fr. Ejares kon dili usab molihok ang simbahan pagpresentar kaniya ngadto sa mga imbestigasyon.

Dili siguro magpataka og akusar ang giingong mga biktima aron lamang mabulingbulingan ang pagkatawo ni Fr. Ejares. Dili siguro nila iamong ang ilang dungog niining ilang akusasyon batok sa maong pari gumikan kay ang maong kaso dako og epekto sa ilang kaugmaon.

Hinuon, wala ko moingon nga sad-an si Fr. Ejares sa maong alegasyon. Apan kon tinuod nga wala siyay sala, nganong dili man siya mogawas sa iyang gitagoan aron pag-atubang sa maong kaso?

* * *

Ipadala inyong reaksiyon sa [email protected]