Dutlan pa kaha?

Si Fr. Carmelo Diola sa Dilaab Movement nipahibawo sa paglusad sa mosunod nga mga adlaw sa kampanya pagpakauwaw sa tanang nahilambigit sa overpricing sa decorative lamps sa niaging 12th Asean Summit. Gawas sa lokal ug nasudnong mga opisyal nga gipasanginlang nakabolsa sa lapad nga kinawatay, pakauwawan sab ang mga magbubuhis kansang pagpabaya maoy nakapasayon sa kahiwian.

Sugdan ang kampanya pinaagi sa advocacy masses sa nagkalainlaing mga parokya kanus-a maghiusa ang mga pari ug mga parokyano pagsaway sa kahiwian sa niaging summit ug sa uban pang anomalusong mga transaksiyon sa kagamhanan. Mosangpot ni sa mas dagko pang kalihokan nga dominahan sa mga pangaliya nga itumong pagpukaw ug pagbanhaw sa pagpakabana sa katilingban batok sa bisan unsang matang sa kahiwian.

* * *

Dinasig sa pelikulang "Inconvenient Truth" ni kanhi US Vice Pres. Al Gore, si Diola nipakisama sa pag-ulbo sa tumang kasuko sa Sugbuanong mga magbubuhis human nabutyag ang grabeng overpricing sa decorative lamps ngadto sa mga baki nga niulpot pag-ayo kay nalabay ngadto sa nagbukal nga kawa. Mahimong mapaslot sila sa eskandalo apan sa kapulihay makalingkawas gikan sa mas dakong kadaot ug hinaot nga, labaw sa tanan, maleksiyon na aron makalikay sa umaabot nga susamang katalagman.

Apan nipasidaan si Diola sa mas dakong trahedya. Nga susama sa nahiagoman sa baki nga gituslob sa kawa nga bugnaw pang tubig apan sama sa kawa sa ibabaw gisugnoran sab sa ilawom. Inay mokisikisi, ang baki mahinangpon nga magpauraray sa inanay nga pagkainit sa tubig. Ug mahimong maluto na sa di pang kamatngon sa kapintas sa sulad nga iyang nahimutangan. Nahadlok siya nga mao ni ang nahitabo sa kinabag-an sa katawhan nga nangiyugpos lang kay nalingla sa mga pagarpar pagtabon sa mga anomaliya nga, lahi sa 12th Asean Summit Scandal, mao nay naandan sa nangaging katuigan.

* * *

Nanghinaot si Diola nga duna pa silay igong panahon sa pagkumbinser sa mga botante sa pagsalikway sa mga kandidato nga nahilambigit ug klarong niburot sa nangalisbong mga kahiwian. Human sa pagkonsulta sa mga eksperto, ipakatap nila ang labing yanong mga giya sa paghimo sa lifestyle check, o pagsusi sa kamakiangayon sa katigayonan nga natumpi sa mga politiko.

* * *

Usa sa natandog sa overpricing sa deco lamps ug niulbo sa pagpakahilom sa mga politiko atubangan sa anomaliya, nga napugos gyod gani pagbalik sa politika, mao si kanhi gobernador Vicente "Tingting" dela Serna. Ang nakapait kay gawas ni Cebu City Mayor Tomas Osmeña, nagpabiling tak-om, wa gyod mangahas pagsaway sa mga responsable sa eskandalo. Di kay kana ra, Hangtod karon, upat ka buwan na human sa summit, silang Gobernador Gwen Garcia ug mga kanhi mayor Teddy Ouano ug Arturo Radaza padayong nagpaugat pagdumili paghatag og kuwentada sa dagko uyamot nilang gasto sa kalihokan.

* * *

Email:[email protected]