EDITORYAL - Limpiyong eleksyon suwayan ta

Usa ka periodista misugyot ngadtos mga botante: Ning umaabot nga eleksyon, suwayan kuno nato ang paghimog piniliay nga walay binuang -- limpyo, wa''y tikas wa''y pinalitay sa boto, etc.

Matud niya -- ug kini nahibaw-an na sa tanan --hugaw ang atong eleksyon sud sa dugay nang panahon. Ug ang resulta dili kredibol mao man gani nga ang mga pildero ug ilang mga sakop magpunay nalang bagolbol hangtud sa pag-abot nasab sa laing eleksyon.

Mangil-ad nga signal ang mosud sa alimpatakan sa mga investor. Tungod niini mawad-an silag pagsalig sa atong gobyerno ug sa mga napiling opisyal niini.

Mao nga mitumaw kining sugyot sa usa ka peryodista: Suwayan kuno nato ang eleksyon nga limpyo -- wa''y tikas, wa''y trampas, wa''y dagdag, wa''y bawas. Suntok sa buwan kini.

Morag kantalitang sugyot apan nagdalag hagit kanatong mga sakop sa katilingbang Pilipinhon.