Pasayloa sila

Ania kita karon sa Semana Santa diin ning semanaha ato na usab nga handumon ang usa sa pinakadakong kalihukan sa simbahang katoliko, ang pagpasakit sa atong manunubos.

Tungod niini nahimo nang tradition sa mga sumusunod ni Kristo Jesus ang paghimo og mga kalihukan sa pagsakripisyo agi og pagtamod sa iyang gihimo aron lamang maluwas sa ipahamtang nga silot ang katawhan sa mga nahimo niining mga kasal-anan. Sulod sa liboan na ka mga katuigan nga gisunod sa mga sakop sa simbahang katoliko ang maong kalihukan. Apan sa pagka karon murag akong naobserbahan nga ang nahisgutang tradition daw gibaliwala na lamang kini sa pipila ka mga magtotoo ni Kristo Hesus. Alang sa uban ang Semana Santa mao na hinoon ang panahon sa paglulinghayaw o paglingaw-lingaw ina kay ilaha unta kining ikonsiderar nga panahon alang sa paghinolsol sa mga kasal-anan ug mga kalapasan niining nahimo. Ina kay adto sa simbahan, atoa na hinoon kini sa mga maanindot nga mga beach resort o ba kaha sa mga imnanan ug mga pasugalan. Daw ila na nga nakalimtan ang mga buot nilang himoon isip mga magtotoo ni Kristo Hesus panahon sa semana santa. Murag hinay-hinay nang nakalimtan sa uban natong mga igsoon sa pagtoo ang pagka balaan ug pagka importante sa paghandum sa mga pasakit ni Ginoong Kristo Hesus. Butang kini nga dapat nang ika alarma sa kadagkoan sa atong simbahang katoliko.

Ngano kaha nga ang mga pagsakripisyo ug paghinolsol panahon sa semana santa hinay-hinay naman kini nga gihulipan sa paglingaw-lingaw ug paglulinghayaw sa ubang igsoon nato sa pagtoo? Napul-an na kaha sila sa pabalik-balik nga tulumanon sa matag semana santa? O wa na lamang sila ganahi niini tungod kay nawagtangan na sila og pagsalig sa atong simbahan gumikan sa daghang mga pari nga nagpabadlong sa ilang pagkadisipolo sa pagsangyaw sa mga pulong ni Hesu Kristo? Ambot lang og unsay inyong tubag niining maong mga pangutana.

* * *

Ang Commission on Elections mipagawas og kamandoan nga nagdili sa mga kandidato sa pagpangampanya panahon sa paghandum nato sa kamatayon ni Kristo Hesus. Ang maong kamandoan gisundan usab kini sa awhag sa Catholic Bishop Conference of the Philippines ngadto sa mga kandidato sa dili paggamit sa kalihukan sa semana santa alang sa ilang pag pangampanya. Manghinaot lang ko nga respitohon sa mga kandidato ang maong mando ug awhag sa Comelec ug CBCP.

* * *

Si Cris Saavedra kinsa maoy whistle blower niining sobra ka mahal nga mga deco lamps misugilon (ngadto sa tigpaminawan sa Super Radyo kaniadtong Lunes sa gabii human siya mitawag kanako aron sa pag-react sa atong gihisgutan) nga posibling gigamit lamang sila si Mayor Teddy Ouano ug Boy Radaza sa Mandaue ug Lapu-Lapu sa panapi sa ubang mga dagkong opisyal sa atong gobyerno. Kining maong pamahayag ni Mr. Cris Saavedra sa akong sabot nagpasabot nga siya mismo wa magtoo nga sila si Teddy ug Boy nakasapi sa grabi ka mahal nga mga decorrupted lampposts.