Bias kuno ako

Usa ka nagpaila nga Geronemo Galesia nga taga Maguikay, Mandaue City ang nagsuwat niining pamantalaan ug mipaabot sa iyang obserbasyon sa akong tulumanon sa DySS ug sa akong column ning maong pamantalaan nga kuno bias ako ngadto sa mga Ouano. Matud pa niya kanunay kuno nako nga gidayeg si Teddy ug Jonkie Ouano sa akong tulumanon sa radyo ug sa akong column dinhi sa Banat News. Gikuhaan og basi ni Mr. Geronemo Galesia sa iyang obserbasyon nga kuno kining inyong ubos nga alagad bias ngadto sa mga Ouano mao ang akong column kaniadtong Marso 20 nga nag-uluhan: KADAUGAN UG KAPILDIHAN NI JONKIE.

Tugoti nga akong iprenta pag-usab ang kinatibuk-ang column aron kamo na mismo akong mga suking tigpaminawan sa radyo ug tigbasahan ning maong pamantalaan ang mohusga kon tinood ba ang mga obserbasyon ni Mr. Geronemo Z. Galesia.

KADAUGAN UG KAPILDIHAN NI JONKIE
By: Gerry Q. Auxilio Jr.
March 20, 2007

Usa ka dakong kadaugan sa politikanhong laraw ni Jonkie Ouano diha sa Mandaue ang pagsibog sa iyang iyaan nga si Joy Ouano sa plano niini sa pagpapili pagka Mayor kontra kaniya. Bisan man tuod kon dili pa klaro kon nagkauli na ba ang maayong kabobot-on nila ni Joy ug Teddy apan sa habig ni Jonkie iyang napakita nga mamahimo siya nga taytayan sa kahiusahan sa banay'ng Ouano diha sa Mandaue pinaagi sa pagdaug sa kasing-kasing sa iyang iyaan nga naglagot pag maayo sa iyang amahan. Ang kahiusahan sa mga Ouano diha sa dakbayan sa Mandaue usa ka dakong puntos ngadto sa kandidatura ni Jonkie sa pagka mayor butang nga angayan nga pangandaman sa iyang mga kaatbang sa politika.

Ang panaghiusa sa mga Ouano usa ka dakong hulga sa kandidatura pagka mayor nila ni Jonas Cortes, Magno Dionson, ug Bise Mayor Ading Seno Jr. kon ugaling dili sila maghiusa. Kon ugaling gusto man nila nga kuhaon ang liderato gikan sa mga Ouano diha sa dakbayan sa Mandaue gikinahanglan nga magkahiusa ang ilang mga pamilya.

Ang panaghiusa karon nila ni Nerisa Soon Ruiz, Joy Ouano ug Teddy Ouano alang sa kandidatura ni Jonkie pagka mayor lig-on. Si Inday Neri makakuha og influencia tungod kay siya kongresista. Si Joy Ouano makahatag usab og boto kay aduna siyay mga dumadapig ug siya pa gayod ang Presidente sa Association of Barangay Council samtang si Teddy Ouano mao karon ang kasamtangang mayor sa dakbayan sa Mandaue, wa pa ni labot sa influencia ni Ingko Pedong ug sa makinarya sa administrasyon. Kining maong kusog sa kandidatura ni Jonkie maalkontrahan lamang kini sa iyang mga kaatbang kon magkahiusa ug dili sila magkabahin-bahin. Kining mga pamilyang Cortes, Seno ug Dionson dagko ug mga enfluenciado usab diha sa Mandaue busa aduna silay igong kusog ( kon magkahiusa ) sa pagpakigbatok sa ilang kontra sa politika. Ikonsiderar nato nga ang dakbayan sa Mandaue clannish. Pun-an pa sa mga isyu sa pagpadagan ni Teddy, igo gyod nga mapatas ang bangga sa mga kandidato sa pagka mayor diha sa Mandaue.

Apan hangtod nga di magkahiusa ang mga kontra sa kandidatura ni Jonkie, ang mga Ouano magpabiling bantayog nga lisod tumpagon sa ilang pagkupot sa gahom diha sa dakbayan sa Mandaue.

* * *

Super Gerry luoy au mga nyt ug local teachers sa Cebu ct, la pa jud sweldo! pukawa intawon ng tagacty hal, bcin ang SEF ggahn nas electin. - Noel

Ang operation sa mga nyt makaingon ta nga maau Super Ger pero louy au me mga nyt teacher dugay au sweldo, until now ang month sa dcember la pa jud me tagae. Unsaon man namo pagtudlo og tarong kung lay sulod among tiyan. Noel

Super Gerry maayo unta iapil nimo sa imo topic sa Banat News kining mga bata nga cige suyop rugby atbang sa Midtown Hotel, kay iapil nko sa ako collection. Junsky

* * *

Mao kini ang entero gayod nga unod sa akong column kaniadtong Marso 20. Kamo nalay hukom kon bias ba kining inyong alagad.

Awhag lang nako ngadto ni Mr. Geronemo Galesia ayaw taptapi ang imong mga mata ug ayaw sampungi ang imong mga dunggan tungod lang sa imong pagdapig ngadto sa usa ka kandidato. Ang akong giladlad sa column kaniadtong Marso 20 usa ka pag-analisar sa dagan sa politika diha sa dakbayan sa Mandaue isip usa ka political science teacher. Kon imo lamang giablihan ang imong dughan human nimo mabasa ang akong column nakita na unta sa imong kasing-kasing ang akong concern sa kadaugan sa imong mga kandidato pinaagi sa sugyot nga magkahiusa kini aron malumpag niini ang bantayog nga gipabarog sa mga Ouano nga tan-aw nako di kini matarog kon pabiling magkabahin-bahin ang mga gustong motumpag niini. Unya Mr. Galesia paminaw pod sa Saksi Evening Edition sa DySS Super Radyo Cebu aron makahibawo ka kon nagdayeg ba ko sa mga Ouano. Di man ugod mao ang imong obserbasyon mao nga seguro gyod ko nga wa ka maminaw sa akong tulumanon sa radyo. Sugod ning imong pagbasa paminaw na sa akong tulumanon alas 6-9 sa gabii aron mosamot na pagka numero uno ang akong programa Saksi Evening Edition, gets mo?