Local contacts?

Hingpit na nga gisang-at sa Philippine Drug Enforcement Agency ang kasong drug smuggling batok sa giingong mga local contacts sa sindikato nga responsabli sa pagpayuhot sa dul-an sa duha ka libo ka kilo nga pseudoephedrine human sa tulo ka tuig nga pag-ukon-ukon. Si Atty. Lydia Bundac, ang legal officer sa PDEA nga maoy gitahasan sa pag-imbistigar sa tulo na ka tuig nga kontrobersiya mitug-an nga nag-una sa mga respondents mao ang kanhi bise gobernador sa Sugbu nga si John-John Osmeña.

Kasong paglapas sa Section 4 sa Republic Act 9165 kon Comprehensive Dangerous Drugs Act of 2000 ang gisang-at sa PDEA atubangan sa Department of Justice didto sa kaulohan batok ni Osmeña ug sa lain pang mga kauban niini lakip sa iyang kanhi mga staff. Tulo sa mga staff ni Osmeña nga sila si Joebert Lañas Cuesta, Rorela Villegas ug Maria Rowena Roldan ang lakip sa mga respondents sa kaso. Gawas nila apil pod ang higala sa kanhi bise gobernador nga si Dirk d' Hultz ug ang nagpailang representante sa Coastside Ventures Incorporated nga si Michael "Mike" Cummings, Leah Banal, Malou Milagros Legaspi ug ang wala pa mailhing mga babaye ug lalaki.

Ang Coastside Ventures Incorporated maoy consignee sa P3.6 bilyones nga kantidad sa pseudoephedrine nga nasakmit diha sa Cebu International Port tulo ka tuig na ang nakalabay. Gawas sa illegal importation lakip sab sa mga kasong gisang-at sa PDEA batok nila mao ang paglapas sa Section 5 kon delivery and transportation, Section 9 kon chemical diversion, section 26 kon conspiracy ug section 32 o paglapas sa Dangerous Drugs Board regulation.

Si Cuesta maoy presidente sa Coastside Ventures Incorporated nga maoy consignee sa 1,710 kilos nga pseudoephedrine nga midangat sa Sugbu niadtong Marso 5, 2004 gikan sa China. Ang mga sakop sa PDEA dinhi sa Central Visayas mitumbok ni Osmeña nga maoy usa sa mga local contacts sa Australia-based syndicate. Sila si PO2 Rey Robert Villarete ug Jude Udtohan kinsa mga sakop sa team nga mihimo sa confidential mission nga giulohan og "COPLAN LATVIA" maoy miila ni Osmeña. Matud nila nga nga ang duha ka mga sakop sa sindikato nga sila si George Michael Kessel ug ang nailhan lang nga si Soria gikatagbo ni Osmeña sud sa usa ka restaurant diha sa Metropolis hotel niadtong February 18, 2004.

Si Osmeña pa ang gikatahong mihatud nila ni Kessel ug Soria gamit ang itom nga Ford Expedition niini paingon sa airport. Ang paglambigit kang Osmeña sa maong drug shipment maoy gituohan nga dakong hinungdan sa iyang kapildihan sa miaging eleksiyon. Karong bag-o nitumaw ang report nga nagtinguha na sab siya paglansar isip kongresista sa first district. Hinaut nga way nagpahiping motibo ang pagsang-at sa PDEA sa kaso labi pa nga ilang gi-atol nga nagsingabot ang eleksiyon. Segurado ko nga mamahimong isyu ang timing sa pagpasaka sa maong kaso.

* * *

E-mail: [email protected]