Numero uno sa corruption

Dili na ikatingala nga ang Pilipinas maoy labing corrupt nga nasud sa Asya. Sukad pa sa pipila ka katuigan, daan na kining nangulo sa listahan sa mga labing corrupt nga nasud sa tibuok kalibotan.

Sa labing ulahing survey nga gipagawas niini, ang Political and Economic Risk Consultancy mibutyag nga ang Pilipinas maoy labing corrupt nga nasud sa mga nag-unang dagkong ekonomiya sa Asya.

Ang survey sa PERC, nga nakabase sa Singapore, nagkanayon nga ang Singapore ug Hong Kong maoy labing "limpyo" nga mga nasud sa Asya. Ang maong mga nasud gisundan sa Japan, Macau, Taiwan, Malaysia, China, South Korea, India, Vietnam, Idonesia, Thailand ug Pilipinas.

"The Philippines has the distinction of being perceived in the worst light," matud pa sa PERC nga gipagawas sa Agence France Presse.

"It is bad and has been going all along. People are just growing tired of the inaction and insincerity of leading officials when they promise to fight corruption," dugang pa sa PERC.

Matud sa PERC, ang nalangay nga kaso sa corruption nga gikalambigitan ni kanhi presidente Joseph Estrada maoy usa sa ehemplo sa laganap ug dili na mapuong corruption sa Pilipinas.

Nalantawan sa mga eksperto nga ang curruption sa nasud nakagamot na bisan sulod sa labing ubos nga buhatan sa kagamhanan. Ug wala na siguroy buhatan sa atong gobiyerno ang wala malikosi sa gamot sa corruption.

Gani dinhi lamang sa atong lugar, daghan sa mga buhatan sa lokal nga kagamhanan ang giakusaran nga nalambigit sa corruption. Ug ako mismo ang nakasaksi niini.

Sa niaging mga semana samtang nagsakay ko og jeep sa downtown area padulong sa opisina, nakita sa duha nako ka mata ang usa ka traffic enforcer kinsa sekreto kaayong midawat og kuwarta gikan sa usa ka traffic violator kinsa iyang nasakpan sa Osmeña Boulevard.

Hinuon, wala nako makita ang nawong sa maong sakop sa City Traffic Operations Managament gumikan kay nagkalo ug nag-sunglass kini. Usa pa, ako lamang gibantayan ang iyang kamot nga yano rang midawat sa salapi nga gipailawman sa resibo.

Ug kinsa bay dili makalimot sa naglagiting nga isyu karon kalabot sa grabe ka mahal nga mga decorative lamppost nga gibutang sa kadalanan nunot sa pagpahigayon dinhi sa Association of Southeast Asian Nations Summit sa nakalabay'ng Enero?

Naukay ang tanan sa dihang mibuto kining maong anomaliya, diin ang presyo sa usa ka lamppost nga nagkantidad lamang og pipila ka libo ka pesos gipaburot hinuon ngadto sa kapin sa P300,000.

Hinuon milihok na ang Ombudsman pagsusi sa maong anomaliya, nga nasentro karon sa mga opisyales sa Department of Public Works and Highways kinsa maoy giakusahan mga maoy nagpaluyo sa pagpalit sa mga overpriced nga mga decorative lamppost.

Gani, mismong si Presidente Gloria Macapagal-Arroyo ang mimando na sa Ombudsman og usa ka makuting pagsusi niining makauulaw'ng kontrobersiya nga misakdap karon sa iyang administrasyon. Nagpasidaan ang Presidente nga kinahanglan nga manubag gayud ang mga nagpaluyo niini.

Mora'g lisod na sigurong maputol pa ang laganap nga corruption sa nasud. Kini tungod kay nakagamot na kini bisan pa man sa labing ubos nga institusyon sa sosyedad nga mao ang pamilya.

Dili nato ikalimod nga usa ka porma sa corruption ang paghaylo sa mga ginikanan og salapi sa ilang kabataan sa higayon nga makakuha sila og dagkong grado sa ilang pagtungha.

* * *

Ipadala inyong reaksiyon sa [email protected]