Dimalas o tinuyoan?

Di ko gustong motoo og dimalas, sukad niadto alang nako ang dimalas usa lang ka kahimtang sa huna-huna sa tawo. Apan sa mga nahitabo sa dakbayan sa Mandaue inanay'ng nausab ang akong panlantaw.

Ambot matawag ba kaha nga dimalas alang sa mga opisyal sa Mandaue ang mga kontrobersiya nga mihasmag karon nila o tinuyoan? Sa unang pagtan-aw sa sitwasyon makaingon kang tinuyoan tungod kay mamahimo unta kining nalikayan kon wa silang mag-apil apil sa paghikay sa program of work sa proyekto pagpanaud og decorative lamppost.

Wa kinahanglana nga ang Mandaue maoy mohimo sa program of work tungod kay sa unang lugar, dili kini ilang proyekto. Ikaduha, di maapektuhan ang proyekto kon wa sila moapil.

Pagmatuod niini, mao ang mga decorative lamppost nga nanguhong sa kadalanan sa dakbayan sa Sugbu. Dili man ang dakbayan sa Sugbu maoy naghimo sa program of work pero nabutangan man og lamppost. Buot pasabot nga wa gyud kinahanglana nga ang local government unit nga butangan niini maoy maghimo sa program of work.

Ambot og sulagma lang ba kaha nga ang lamppost nga gibutang sa Mandaue diin sila maoy naghimo sa program of work mas mahal kay sa lamppost nga dia sa dakbayan sa Sugbu?

Posibli kaha nga moabot pod og P224 mil matag-usa ka lamppost dinhi sa dakbayan sa Sugbu kon sila poy nipreparar sa program of work? Si Mayor Teddy Ouano miingon nga wa silay apil kon duna may overpricing nga nahitabo niini tungod kay ang DPWH maoy responsabli niini.

Gani, wala pa ni ma turn-over ngadto sa local nga kagamhanan hangtud karon. Busa kon duna may angayang sunggalon sa maong kadudahan kaayong transaksiyon way lain kon di ang mga opisyal sa DPWH.

Apan di sab hinuong kamahay si Ouano sa publiko kon dali ra kaayong nakapanulisok ngadto niya tungod kay napasanginlan naman gud sila niadtong tuig 2003 nga mipaburot sa presyo sa ilang gipamalit nga mga decorative lamppost diha sa ilang heritage park atbang sa City Hall.

Ang report sa Commission on Audit niadtong 2003 mikasaba sa mga opisyal sa Mandaue tungod sa matud pa "extravagant" ug "excessive" nga mga lamppost nga ilang gipalit kaniadto.

Basi sa COA report moabot sa P110 mil ang matag-usa ka lamppost nga gipamalit niadto sa Mandaue.

Wala pa gani makaginhawa sa kontrobersiya sa lamppost si Ouano gisungog pa gyud siya sa dakong sunog nga miulbo sa barangay Mantuyong niadtong Miyerkules sa hapon diin kapin sa libo ka pamilya ang nabiktima.

Ang sunog nga mipatong karon sa problema sa mga Ouano maisip na kaha nga dimalas? O tinuyoan gihapon? Nakapangutana ko niini, human si Mayor Ouano miingon nga nagduda sila nga gituyo ang maong sunog.

Matud niya sa interbyu sa DYLA nga duna silay nadunggan nga miingon nga mas maayo pang dauban ang maong dapit.

* * *

[email protected]