Turismo

Dili maayo ang performance sa Pilipinas sa natad sa turismo. Kini base sa world economic forum mahitungod sa tourism competitiveness report. Bisan pa man sa mga gipasigarbo nato nga mga nindot kaayo nga mga talan-awon layo pa gihapon kita kon ikomparar sa ubang kasilinganan natong kanasuran dinhi sa Asia ug tibuok kalibutan kon hisgutan ang turismo.

Sa 124 ka mga nasud, ang Pilipinas nahimutang lang sa ika 86 sa mga nasud nga naila sa ilang mga maanindot nga talan-awon. Gani nag una pa kanato ang mga nasud sa Malaysia, Korea, Thailand ug Indonesia. Sa 124 ka mga nasud nag una ang Switzerland, Austria, Germany, Iceland, America, Hong Kong, Canada, Singapore, Luxemburg ug United Kingdom.

Pipila sa mga turista nga mibisita dinhi sa nasud ang nagreklamo sa grabeng kahoot sa dagan sa trapiko ug grabe ka hugaw sa pipila nato ka mga talan-awon.

Suma pa usab sa world economic forum nga hinay ang Pilipinas sa natad sa transportation, infrastructure, safety and security ug natural and cultural resources.

Ang departamento sa turismo miangkon nga daghan pa gyod ang gikinahanglan nilang buhaton aron mosikat ang Pilipinas isip usa ka maayo nga tourist destination sa kalibutan.

* * *

Ang dili maayo nga dagan sa atong turismo dinhi sa Pilipinas nanginahanglan og dinaliang pagtagad kun ugaling gusto pa kita nga dili mabiyaan sa kasilinganan natong mga kanasuran. Busa angayan kini nga tutukan pagmaayo ni kalihim Ace Durano. Apan samtang magpabilin pa si Ace Durano isip tigpamaba sa Team Unity dili siya makapunting sa iyang panahon ngadto sa pagpalambo sa atong turismo nga iyang gipangulohan.

Sugyot nako ngadto ni Presidente Gloria Macapagal Arroyo, ipalayo lang si kalihim Ace Durano sa politika aron mahatag niya ang iyang tanang panahon sa pagpalambo sa atong turismo. Ang paghulip ni Ace Durano isip tigpamaba sa Team Unity makatabang pa kini sa partido kon ang ibutang nga hulip kaniya walay kabilinggan sa atong gobyerno kana tungod kay makapunting naman unya kini sa iyang trabaho isip tigpamaba sa Team Unity.

Kon tumanon sa Presidente kining ubos ug pinobre tang tambag, mamahimo unyang mas epektibo si kalihim Ace Durano sa iyang trabaho isip pangulo sa departamento sa turismo kay dili naman unya siya mabalda sa iyang pagpaguwapo ug pagpaguwapa sa mga kandidato sa Team Unity ug dili na pod unya siya malinga sa pagpanubag sa mga isyu nga ibato sa Genuine Opposition ngadto sa ilang partido, isip tigpamaba sa Team Unity. Mamahimo na pod unya nga mas epektibo pa ang tigpamaba sa team unity sa iyang trabaho kay wa naman unya siyay lain pang atimanon gawas lang sa pagbaligya sa iyang mga kandidato.