Magtigi pag-usab

Mora'g plastada na ang han-ay sa dagan sa politika sa probinsiya sa Sugbu karong umaabot nga piniliay human sa gikatahong pagsalga ni kanhi kongresman Celestino "Junnie" Martinez, Jr. pagkagobernador batok kang Gobernador Gwen Garcia.

Gilauman nga kulbahinam na usab ang ilang kumbati sa umaabot eleksiyon tungod kay rematch kini sa ilang panagtigi kaniadtong 2004. Kahinumduman nga sa nakalabay nilang panagsangka, 7,000 kapin lamang ang labaw ni Garcia batok kang Martinez.

Pulos lig-on ang mga kandidatura ni Garcia ug Martinez sa rason gipaluyohan sila sa mga dagkong partido sa Pilipinas. Si Garcia gipaluyohan sa iyang bag-ong naumol nga One Cebu party ug Kampi, ang partido politikal ni Presidente Gloria Macapagal-Arroyo, samtang si Martinez suportado sa labing dakong partido sa nasud karon, ang Lakas ni House Speaker Jose de Venecia.

Hinuon alang kanako, dako og lamang si Garcia batok kang Martinez tungod kay siya ang anaa sa poder. Sa kasaysayan sa politika sa nasud nga sa matag piniliay, dako gayud og tsansa nga modaug ang incumbent nga opisyal batok sa iyang mga kaatbang.

Ang nag-unang hinungdan niini mao nga anaa sa incumbent nga opisyal ang daghang resources tungod kay siya man ang anaa sa puwesto. Ang ikaduha mao nga tungod sa iyang pagpaulan og nagkalainlaing proyekto ngadto sa iyang mga konstituwenti, dili malalis nga makaingon sila nga wala mausik ang ilang pagboto sa maong opisyal alang sa katungdanan.

Kini wala pay labot sa kanunay nga pagbisita sa usa ka incumbent nga opisyal ngadto sa kabaranggayan isip pagsabwag og mensahe nga duol sila sa iyang dughan.

Ang tulo ka rason maoy labing gisaligan sa usa ka incumbent nga opsiyal gumikan kay nagtangag kini og dakong tsansa nga masubli siya sa iyang katungdanan. Kini wala pay labot sa dakong suporta gikan sa nasyonal nga partido politikal.

Apan dili usab makasiguro si Garcia nga klaro na ang iyang kadaugan sa umaabot nga eleksiyon. Dili basta-basta nga kontra si Martinez gumikan kay beterano na kini sa politika.

Dili ikalimod ni Garcia nga tang-an na usab sa politika si Martinez, kinsa dugay na usab nga representante sa ikaupat nga distrito sa Kongreso. Sa akong tan-aw, wala pa gihapon mawala ang magic sa mga Martinez sa ikaupat nga distrito tungod sa ka dako sa ilang impluwensiya sa maong lugar.

Ug dili lamang ang ikaupat nga distrito maoy gisaligan ni Martinez sa rason nga duna kini daghang kaalyado sa ubang mga distrito sa probinsiya nga kaatbang usab sa presente'ng namunoan sa Kapitolyo.

Atong mahinumduman nga tulo ka mga distrito sa Sugbu ang gusto mobiya sa probinsiya aron magkinaugalingon. Gani, nag-ung-ong na ang tulo ka sugyot sa Ubos Balay Balauranan nga nagtumong paghimo og tulo sa bag-ong probinsiya gikan sa distrito dos, tres ug kwatro.

Karong umaabot piniliay, siguradong adto gayod mosuporta kang Martinez ang mga kongresman sa distrito dos ug tres bisan pa man sa dulom nilang ambisyon paghimo nga lalawigan sa ilang tagsatagsa ka distrito. Ug sigurado gayud nga daghan sila'g mahakot nga botante alang sa kanhi kongresman.

Ato na lamang paaboton ang kulbahinam nga kumbati alang sa labing taas nga posisyon sa Kapitolyo.

Ipadala inyong reaksiyon sa [email protected]