Komisyon

Si Mayor Boy Radaza sa dakbayan sa Lapu-Lapu gipasanginlan sa magpapatigayon nga sila si Richard ug Rafael King nga nangayo kini og tulo ka porsiyento sa tunga sa bilyon nga proyekto nga nakuha sa Young Builders nga gipanag-iya ni Nelson Yu.

Ang pasangil sa mga King ilang gibasi sa pamahayag ni Nelson Yu atol sa ilang panagsulti nga nakuhaan ug na-record sa security camera sa dapit diin didto sila nagsulti. Apan si Nelson Yu mitiyabaw sa gihimo sa mga King ug mipasangil nga gibutang-butangan lamang siya ug gi frame-up niini kana kay aduna silay nakapundo karon nga kaso sa hukmanan batok sa mga King mahitungod sa wa pa mabayri niining utang nga nagkantidad og 32 milyones ka pesos.

Ang pamakak ni Nelson Yu matubag sa na-record nga panagsultianay nila ni King busa klaro na nato kini. Ang wa pa lamang nato maklaro mao ang motibo sa mga King pagpagawas sa recorded conversation, kon ila ba kining gipagawas batok lamang sa mga Radaza o batok usab ngadto ni Nelson Yu kinsa naipit karon sa iyang maayong relasyon ngadto sa kagamhanan ni Mayor Boy Radaza sa dakbayan sa Lapu-Lapu. May kaso man ugod nga gipasaka kini si Nelson Yu batok sa mga King samtang ang mga King aduna usay kalagot sa kagamhanan ni Mayor Boy Radaza gumikan sa pagpaguba niini sa Agus Cove nga gipanag-iya na sa mga King. Tuyo kaha sa pagbulgar sa mga King ang pag-igo og duha ka langgam sa usa lamang ka tira?

Mahitungod sa komisyon nga gipangayo ni Mayor Boy Radaza, makaingon seguro ang iyang mga tigpaluyo nga dili kaayo tantong kurakot ang ilang mayor kana tungod kay tulo ka porsiyento lamang ang gipangayo niini sa tunga sa bilyon nga proyekto. SOP man ugod sa mga proyekto sa gobiyerno ang 10, 15, 20 ug gani ang uban 30 porsiyento unya mangayo pa gayod og pakapin nga upat ka kolehiyalang birhin.

Apan di gihapon makalusot si Mayor Boy Radaza ug ang iyang mga tigpaluyo sa reklamo sa mga King kana gumikan kay namahayag si acting deputy ombudsman sa Visayas Virginia Palanca Santiago nga ang Standard Operating Procedure kon SOP sa gobiyerno mao ang saktong pagtrabaho sa proyekto, ang paghuman niini sa tukmang oras ug ang pagsunod sa presyo niini ngadto sa katapusang centavo. Busa klaro ug tataw na kaayo nga wala gayod itugot sa atong gobyerno ang gihimo ni Mayor Boy Radaza kon tinood ang pasangil sa mga King ngadto kaniya.

Pero kining gipasangil sa mga King batok ni Mayor Boy Radaza tuldok lamang kini sa atong mga nahibaw-an. Kaniadto sa didto pa ko sa Bombo Radyo gireklamo pud ni siya sa usa ka konsehal diha sa Lapu-Lapu kaniadto tungod sa pagpamalit og surgical gloves nga porbidang mahala. Sayonan mo nga ang tag 149 pesos lamang nga surgical gloves iyang gipamalit og tag 2,690.00 pesos. Gawas niini namalit pa gyod ni og tambal nga tag 500 pesos ang usa nga duha na lang ka buwan mohupas o mag expire na. Wa pa ni labot sa minilyon nga iyang gipangayo matod pa sa mga negosyante nga nag negosyo sa dakbayan sa Lapu-Lapu.

Kamong mga taga Lapu-Lapu wa mo masayod sa gihimo sa inyong tinamod, tinahod ug halangdong mayor?