Kamag-anak Inc vs. artista power

Giladlad na sa opposition ang ilang mga kandidato sa pagka Senador, ug kini gilangkuban sa pipila ka mga pangalan nga miyembro ra sa maong pamilya, sama ni JV Ejercito, igsoon ni Senador Jinggoy Estrada sa amahan, Congressman Allan Peter Cayetano nga igsoon ni Senadora Pia Cayetano, Atty. Koko Pimentel, anak ni Senador Nene Pimentel, ug Congressman Noynoy Aquino, pag-umangkon ni kanhi Senadora Tesie Aquino Oreta nga magpapili usab sa pagka Senador. Kadudahan upod nga magpapili sa pagka Senador si Lipa City Mayor Vilma Santos, asawa ni Senador Ralph Recto. Ang mga kandidato sa opposition gitawag og KAMAG-ANAK INC.

Ang administrasyon mipahibalo na usab nga pipila sa ilang padaganon sa pagka Senador mao ang mga artista nga sila si Richard Gomez, Edu Manzano ug Cesar Montano. Gihugon-hugonan usab nga sa administrasyon malinya ang kanhi Senador nga artista nga si Tito Sotto ug Vilma Santos nga naila na nato nga si Ate Vi. Magpapili usab sa pagka mayor sa Makati City ubos sa administrasyon ang laing Senador nga artista nga si Leon Guerrero este, si Lito Lapid diay.

Kung way kausaban sa linya sa mga kandidato sa administrasyon ug opposition niining umaaabot nga bugnong lugaynon, ang mahitabo niini, magtakos ang KAMAG-ANAK INC ug ang ARTISTA POWER. Pastilan no? Kining administrasyon nagtoo seguro nga ang piniliay karong Mayo sama sa Starstruck sa GMA7, Pinoy Big Brother sa ABS-CBN o ba kaha Pinoy Idol sa ABC 5. Nagtoo seguro ang administrasyon nga ang Senado entablado? Samtang ang opposition nagtoo usab nga sila ra ang makamao, ilabi na ang mga bansagong Ejercito, Cayetano, Pimentel, Aquino ug Recto.

Dili ikalimod nga kining mga pangalan nga gipagawas sa administrasyon ug opposition mga sikat, mao na nga sa pulong pa ni Secretary Mike Defensor gikuha nila ang mga artista tungod sa winnability niini. Gusto man ugod sa matag kampo ngas modaug gayod ang ilang mga kandidato sa ubos balay balauranan ug sa Senado tungod sa mga interest niini nga gustong isulong. Ang Opposition gustong makuha ang mayoriya sa ubos balay balauranan aron dili na sila maglisod sa pag-impeach sa presidente. Gusto usab nilang seguroon sa pagkuha ang mayoriya sa Senado aron wa nay problema ang impeachment sa presidente pag-abot niini sa Senado. Ang administrasyon gusto usab nga makuha nila ang kabag-an sa ubos balay balauranan aron dili gihapon makalusot ang impeachment sa presidente ug kon makalusot man kini dili gihapon kini magsilbi pag-abot niini didto sa Senado kon kontrolado niini ang mga miyembro. Kini ang hinungdan kong nganong mga sikat ang ilang gipangkuha nga mga kandidato.

Apan angayan nga mahibaw-an sa matag kampo opposition man o administrasyon nga ang katawhan wa manginahanglan og sikat. Ang gikinahanglan sa katawhan karon mao kadtong sensiro ug makahibawo sa iyang trabaho. Ang katawhan wa manginahanglan og mga kandidato nga maayo lang sa arte. Wa usab manginahanglan ang katawhan sa mao lang gihapong bansagon kay pool na ug lood, pwe!!

Hinuon sa ako nang gikaingon, kita ra gihapon ang modisider kon unsay atong gusto nga mahitabo sa Senado sa pag-abot sa piniliay. Gusto ba kitang dumalahon sa Kamag-anak Incorporated o sa artista power. Lungsod, ikaw ang maghukom.