Gustong mag-senador

Dili mapugngan sa tumang kasayon ang desisyon sa mga artista nga magpapili sa lainlaing posisyon karong Mayo nga eleksiyon.

Batakang katungod sa mga artista ang pag-apil-apil sa politika. Batakan tungod kay kun makaabot lamang sa qualifications nga gilatid sa 1987 nga Konstitusyon, mahimo na silang makasang-at og certificate of candidacy.

Ang angayan mabasol nganong libre silang makadagan sa pagka-senador tungod kay ang Konstitusyon naglatid nga mahimong modagan ang usa ka Pilipino sa pagka-senador kun makamao kining mobasa ug mosulat. Walay college o masteral o doctoral qualifications nga nalatid sa Konstitusyon alang sa kandidato pagka-senador o kongresista, hasta na ang pagka-presidente ug pagka-bise presidente.

Apan, angay untang hunahunaon sa mga artista kun unsay mahimo nila sa usa ka elective nga posisyon kun simbako og mapili.

Kadaghanan kanila, sama ni Richard Gomez, wala gyuy makasulay og hupot og posisyon bisan sa pagka-konsehal man lang sa barangay.

Tan-awa gud ninyo si Senador Lito Lapid, maayo pa ang mga kagawad sa among barangay sa San Nicolas Proper makamao pa mo-debate. Kun pa-debatehon si Kapitan Cenon Bacus ug si Lito Lapid, mas undanon pa tingaleng paminawon si Kap Bacus kay ni Leon Guerrero kang kansang nakamahoan mao ra gyud ang pag-inartista.

Wala nay bali kun tikdolan nato pag-ayo si Lito Lapid kay nakadaog na kini. Ang ako lang, magamit nato nga argumento ang pagka-walay performance ni Lito Lapid aron dili na madungagan pa og laing sama kaniya ang Senado.

Kun ibutang si Richard Gomez sa Senado, unsa man intawoy mahimo niini? Kutob ra gyud sa pa-guwapo?

Bisan lisud na ibalik ang mga panahon nilang Senador Diokno, Tolentino, Claro Recto, Jovito Salonga, apan kitang mga botante ang giyab-an sa malisud nga tahas pagprotehir sa kabalaanon ug kagawasnon sa atong Senado.

* * *

PAMILYA. Adunay laing bantayan nato nga mga botante sa Mayo nga eleksiyon. Adunay mga pamilyang buot modominar sa Senado paghimo niining extension sa ilang panimalay.

Sama pananglit ni Mayor JV Ejercito sa San Juan nga anak sa gawas ni kanhi Pres. Joseph Estrada. Simbako og mapili siya, duha na silang anak ni kanhi Pres. Joseph Estrada tungod sa presensiya ni Senador Jinggoy Estrada.

Ang wala nako magustohi mao ang plano ni Kongresista Allan Peter Cayetano nga mo-apas sa iyang maguwang nga si Senador Pia Cayetano sa Senado. Ang gikuyawan sa kadaghanan nga kun may away sa pamilya ang magsuon, kuyaw'g anha sa hawanan sa Senado magnilabayay og sapatos.

Si Kongresista Benigno "Noynoy" Aquino III gustong magpapili pagka-senador. Ang iyang iyaan nga si Teresa Aquino-Oreta dili usab magpapugong. Kun akoy Oreta, mopahulay na lang siya aron masulayan sa mga botante ang kakilas sa junior ni Ninoy.

* * *

PICHAY. May pipila ka kontrobersiyal nga kongresista nga gustong mag-senador.

Usa niini si Kongresista Prespero "Butch" Pichay

. Usa ka Arroyo die-hard si Picha y mao pirme kining anaa sa "limelight."

Mao gani nga siyay mibarog karon nga majority floor leader sa kasamtangang Kongreso.

Apan wala ba kamo masayod nga gidilian kini si Pichay sa iyang mga konstituwente sa Surigao del Sur?

Bisan unsa gud ka-suod ni Pichay ni Pres. Arroyo ug pagka-majority floor leader, wala gyud intawon kini nahimong kaayuhan sa iyang distrito sa Surigao del Sur.

Ang karsada lang daan gikan sa Surigao del Norte paingon sa Tandag, Surigao del Sur hangtod karon nagpabiling wala ma-semento o ma-aspalto, puwera lang sa mga lungsod nga giingong iya ang mga mayor.

Walay "development" nga makit-an sa iyang distrito. Wala gani department store nga iyang ikapanghambog.

Labaw nang lisud hikit-an si Pichay sa iyang distrito tungod kay atua kini magpirmehan sa Manila diin atua kini manimuyo ug atua didto ang kadaghanan sa iyang mga negosyo.

Unya, mag-senador siya? Wala man gani nahimo sa iyang distrito, mag-senador na hinuon?

Pananglit makadaog, unsa man iyang mahimo sa Senado? Igo lang mopadako sa iyang gahum pagpanghilabot sa Bureau of Customs?