Bugok nga kawsa

Mihugpa sa Sugbo ang gatosan ka mga militante gikan sa nagkalain-laing lugar sa nasud atol sa pagpahigayon sa 12th Association of Southeast Asian Nations Summit nga kasamtangang gipahigayon karon sa Cebu International Convention Center.

Ang ilang pag-anhi walay kalabotan sa unsa mang maayong kasabotan nga makab-ot sa mga lideres sa ASEAN ug sa mga dialogue partner. Hinuon, nia sila aron pagsamok-samok sa kahapsay sa dagan sa maong katiguman nga maoy naghatag og hulga sa siguridad sa mga delegado.

Hinuon, makasabot kita sa kawsa niining mga sakop sa mga militanteng pundok. Apan usahay subra usab ang ilang mga protesta batok sa kagamhanan nga mosangpot usab ngadto sa mga mainiton ug bayolente nga konprontasyon tali kanila ug sa mga otoridad.

Kini sama pananglit kon sila makalapas sa mga lagda pagpahigayon og hapsay nga mga protesta sa kadalanan. Daghan niining mga militante ang dili manumbaling sa kapolisan ug mosal-ot hinuon ngadto sa mga lugar nga gidili alang kanila.

Tungod niini, dili malikayang motumaw gayud ang bayolente'ng konprontasyon tali kanila ug kapolisan kinsa igo lamang nagtuman sa palisiya.

Ang kamatuoran mao kini nga daghan sa mga militante ang mag-abusar usab paghangop sa ilang kawsa nga kon adunay dautang mahitabo kanila ang kagamhanan dayon maoy ilang basolon. Nganong dili man gayud nila tumanon ang mga lagda alang sa malinawong pagpahigayon sa ilang mga protesta?

Walay laing nagtukmod sa mga militante ngadto sa kadalanan kondili ang ilang bugok nga kawsa, nga kansang misyon mao ang paglawgaw sa kahapsay ug kalinaw sa komunidad pinaagi sa dili nila pagtuman sa lagda sa pagpahigayon sa malinawong protesta.

Ug kon aduna gani dautang mahitabo kanila sa ilang mga pagprotesta, ang kagamhanan dayon maoy ilang rumbohon.

* * *

Nindot nga tan-awon ang Metro Cebu, partikular na sa dakbayan sa Sugbo, nunot niining gibuhat sa mga lokal nga opisyal pagpaanindot sa kadalanan alang sa ASEAN Summit nga kamulo karong gipahigayon sa atong lugar.

Apan ang nakaaghat nako pagsulat niini mao ang hulagway sa mga tourist destination sa lalawigan nga naglaray sa Osmeña Boulevard alang sa pagsud-ong sa mga bisita. Dako kini og ikatabang sa promosyon sa turismo sa atong dapit nga dunay dakong potensiyal nga mamahimong nag-unang tourist destination sa nasud.

Sa ilang pagbisita sa Sugbo, daghan sa mga bisita ang dili ikalimod nga maglaway magsud-ong sa maong mga hulagway tungod sa talagsaong gasa sa kinaiyahan nga naangkon sa Sugbo.

Ang pagpalambo sa lokal nga industriya sa turismo maoy kinahanglan nga nag-una sa agenda sa kagamhanan sa probinsiya. Daghan pa nga mga lungsod sa lalawigan ang nagkinahanglan og dakong promosyon aron pagsulbong sa ilang tagsatagsa ka industriya sa turismo.

Sa pagkakaron, ang dakbayan sa Lapu-Lapu ug ang isla sa Malapascua lamang ang mihakot sa dakong promosyon sa turismo gikan sa kagamhanan sa lalawigan. Subo nga palandungon nga ang ubang lungsod sa lalawigan nangikog niining maong promosyon nga unta duna usab silay ikabuga paghakot og mga turista.

Usa sa mga lugar sa Sugbo nga angay hatagan og dakong pagtagad sa kagamhanan sa lalawigan mao ang isla sa Camotes. Kulang kaayo sa promosyon ang isla sa Camotes isip usa sa mga nag-unang tourist attraction sa Sugbo.

Gani didto sa maong isla makita ang pipila ka beach resort nga angay gayod ikapanghambog ngadto sa mga lokal ug langyaw'ng mga turista. Dili lamang nindot nga mga beach ang makita didto sa maong isla kondili ang maanindot usab nga lanao nga nahimo na usab nga inila sa mga lokal nga turista.

Gani ang maong lanao maoy nahimong "cleanest lake" sa Pilipinas pipila na ka tuig ang nakalabay gumikan usab sa maayong pagdumala sa lokal nga kagamhanan sa lungsod sa San Francisco pagmintenar sa kalimpiyo niini.

Hinuon dili lamang ang isla sa Camotes ang angay nga hatagan og dakong promosyon sa kagamhanan sa lalawigan. Daghang mga lungsod sa probinsiya ang adunay dakong potensiyal nga mahimong major tourist destinations gumikan sa ilang kaanindot.

* * *

Ipadala inyong reaksiyon sa [email protected]