Politikanhong dinastiya

Daghan ang nag-ingon nga niining umaabot nga bugnong lugaynon, ang mga Garcia sa Sugbo magtukod og ilang kaugalingon nga politikanhong dinastiya. Kini human mihukom si kanhi Gobernador Pablo Garcia sa pagpapili isip kongresista sa ikaduhang distrito sa lalawigan sa Sugbo. Gawas kang Pabling, magpasubli pagpapili usab ang iyang anak nga si Gwen Garcia sa pagka gobernador samtang ang igsoon niini nga si Atty. Pablo John Garcia magpapili sa pagka kongresista sa ikatulong distrito sa probinsiya sa Sugbo. Tungod niini misibaw na usab ang issue sa politikanhong dinastiya. Ang uban kanato misaway sa mga politiko gumikan sa pagtukod og dinastiya sa politika. Apan mapakasa ba ugod nato ang mga politiko kon magtukod sila og dinastiya sa politika? Ang mga politiko, politiko gayod, mauna nga kada piniliay motanyag gayod sila sa ilang kaugalingon sa pagpapili, matibuok mang miyembro sa pamilya ang magpapili o usa lamang ka miyembro sa ilang pamilya. Mao na nga kasagaran sa mahitabo mao rang apilyedoha ang nagdumala sa usa ka lugar kon hisgutan ang politika.

Ang mga politiko dili nato mapakasala kon ugaling nakatukod o magtukod man sila og politikanhong dinastiya. Ang atong mabasol sa pagsibaw sa politikanhong dinastiya mao kita mismong mga botante, kana kay kita ang mopili o nagpili sa mao rang mga apelyido sa mga panahon nga adunay piniliay. Ang mga politiko kay politiko, magpapili gayod sa matag panahon nga adunay piniliay ug anaa ra usab kanato ang pagpili kanila. Mao nga kon supak kita sa politikanhong dinastiya dili nato hutdon sa pagboto ang mao rang spiling sa apilyedo inig sulod nato sa voting precinct.

* * *

Gipahibalo ni Presidente Gloria Macapagal Arroyo nga madayon na gayod ang 12th Asean Summit nga ipahigayon dinhi sa Sugbo kini bisan pa man kon wa pa gihapon bakwia sa mga dagkong nasud sa kalibutan ang ilang travel advisory dinhi sa nasud sa Pilipinas. Ang ako lang gikabalak-an basin kon di na sad madayon ang summit kay nagsige na ra ba usab og uwan, basin aduna na usab unya'y bagyo. Kini ra bang atong mga organizer mas mahadlok pa sa bagyo kay sa hulga sa terorista. Gawas pa niana, basin magbusagak na pod unya ang uwan kay buslot pa gihapon ang atop sa Cebu International Convention Center diin ang ubang kalihukan sa Summit anha ipahigayon.