Kagaw sa politika migimok na

Wala pa gani makabuwelo ang tuig 2007, grabe na nga migimok ang kagaw sa politika sa lokal ug nasyonal nga eksena. Gikan sa Batanes ngadto sa Tawi-Tawi, puntarya karon sa mga politiko ang eleksiyon karon Mayo.

Silang tanan pulos nagmugna na og mga plano aron pagdaug sa maong piniliay. Hinuon daghan ning maong mga plano wala nagsubay sa balaod tungod usab sa pagkahakog sa gahom sa ubang kandidato.

Layo pa ang piniliay apan ato nang nasinati ang mga gubot luyo sa mga politkanhong interest sa mga posible'ng mokandidato karon Mayo. Gani, karon pa lamang nagsugod na paghinapakay og lapok ang mga politikong magkaatbang sa sunod piniliay.

Sa lokal nga eksena, misugod na pagbukal ang takuri sa politika sa dihang mipadayag si Jonathan Guardo sa iyang plano pagtukod og partido politika nga iyang ikontra batok sa kusgang Bando Osmeña Pundok Kauswagan ni Mayor Tomas Osmeña.

Matud pa ni Guardo, siya ug ang iyang grupo wala mahadlok sa BOPK ug andam silang moharong batok sa kandidatura ni Osmeña ug sa kinatibuk-ang BOPK, nga mao karon ang naghari sa konseho sa dakbayan sa Sugbo. Bisan sila si north district Rep. Raul del Mar ug south district Rep. Antonio Cuenco ilalum man sa BOPK.

Hinuon, wala usab mahadlok si Osmeña sa plano ni Guardo pagtukod og partido politikal alang karong piniliay. "It's good for the city that we are practicing democracy here," matud pa ni Osmeña kinsa mihangop hinuon sa lakang ni Guardo.

Kahinumdoman nga si Osmeña ug Guardo, ang kanhi tsirman sa Cebu City Sports Commission, ang nagkasumpaki sa isyu sa pagpagawas og pondo alang na Southeast Asian Games nga gipahigayon dinhi sa Sugbo niadtong 2005. Ang maong panagbingkil misangpot sa pagpalagpot ni Osmeña kang Guardo gikan sa komisyon.

Si Guardo gikataho nga desidido nga moalkontra ni Cuenco pagka-kongresista sa sunod eleksiyon. Gani, isip unang lakang batok kang Cuenco, nagplano si Guardo nga mopasaka og kaso batok kang Cuenco tungod sa iyang giingong paggamit sa kongresista sa salapi sa gobiyerno alang sa kandidatura.

Ato lamang atangan ang mainit nga kumbati ning mga magkaatbang sa politika karong piniliay. Daghan ang naghinamhinam nga mas alegre kining umaabot nga eleksiyon tali sa mga lokal nga kandidato. Kini tungod kay dinhi nato makita ang tinud-anay nga kamas sa politika ikumpara sa nasyonal nga eksena.

Hinuon nagkainit usab ang politika sa national level karon. Ug bise karon ang oposisyon paghan-ay sa ilang line-up alang sa senado. Dili pa konpirmado ang tiket sa oposisyon apan siguradong gisakyan kini niadtong mga prominenteng politiko sama kanila ni Teofisto Guingona, Ernesto Maceda, Tito Sotto ug uban pa.

Wala pay klaro ang han-ay sa administrasyon. Apan siguradong nangandam na kini alang sa politikanhong kumbati batok sa oposisyon.

Daghan ang nagtuo nga ang umaabot nga piniliay maoy labing alegre sa kasaysayan sa nasud. Ug manghinaut lamang kita nga dili kini mamahimong dugoon sama sa nangaging eleksiyon.

* * *

Ipaladala inyong reaksiyon sa [email protected]