Ayaw pagtago 'Padre Ben'

Nagkainit kining isyu nga gikalambigitan sa usa ka "Padre Ben," kinsa gipasanginlan nga "nanghikap" sa mga tinun-ang babaye sa Abellana National High School atol sa Life in the Spirit Seminar nga gipasiugdahan sa Oasis of Love niadtong Nobiyembre.

Kini gumikan kay hangtud karon wala gayud siya mitumaw sa publiko aron pagpanghimakak sa mga pasangil nga gihapak batok kaniya. Gani, gikatahong tua na sa Mindanao si "Padre Ben" aron kuno paglikay sa isyu nga naghatag na og dakong kaulawan sa Simbahan Katoliko.

Tak-om usab ang baba sa kadagkoan sa simbahan mahitungod sa pagkatawo ni "Padre Ben." Bisan pa man sa pagsukitsukit sa mga mamahayag, wala gayuy usa kanila nga mipagawas kon kinsa kini si "Padre Ben."

Gani, ultimong si Ricardo Cardinal Vidal wala gayud mihatag bisan gamay'ng impormasyon kabahin sa maong pari ngadto sa medya. Si Vidal giingong dili kuno mobutyag sa ngalan sa maong pari tungod kay usa kini ka kalapasan sa katungod sa maong pari.

Gani, Wala usab magsilbi ang paningkamot sa Department of Social Welfare and Development sa pagpahigayon og dayalogo tali sa mga tinun-ang biktima ug ni "Padre Ben" aron paghilot sa maong isyu. Kini sa dihang wala mosugot ang kadagkoan sa simbahan ug ang Oasis of Love alang sa maong dayalogo.

Apan wala hinuon magsilbi ang paningkamot sa simbahan pagpatay sa maong isyu gumikan sa pagpakahilom niini ug mismo ni "Padre Ben." Sipyat sila kon nagtuo sila nga mapalong ra ang maong isyu pinaagi sa ilang pagpakabungol sa maong akusasyon batok sa maong pari.

Hangtud nga dili ibutyag sa simbahan kon kinsa ang maong pari, dili gayud mamatay ang maong isyu sa rason nga mas mosamot kaikag ang publiko sa tanghaga nga naglikos niini gumikan sa pagtalaw ni "Padre Ben" sa pagpadayag sa iyang habig bahin sa maong alegasyon.

Labing maayo nga mogawas na lamang gikan sa iyang pagpakahilom si "Padre Ben" aron usab nga madungog sa publiko ang iyang habig. Siya ang alaut kon padayon siyang magbukot sa habol sa pagpakahilom tungod kay dili gayud mamatay ang maong isyu samtang dili madunggan sa publiko ang iyang habig.

Sa iyang padayong pagpakahilom, daghan hinuon ang makahunahuna nga tinuod gayud ang maong alegasyon sa mga tinun-an. Ug dako hinuon kini og ikadaot sa personalidad ni "Padre Ben" ug mismo sa simbahan nga iyang gipanumpaang alagaran.

Hinuon ang pagsulbong sa maong isyu wala magpasabot nga guilty na si "Padre Ben" sa maong alegasyon. Ug kini mao na ang panahon nga iyang ipakita ngadto sa publiko ug mismo sa kadagkoan sa simbahan nga wala siyay dautang nabuhat batok sa mga estudiyante atol sa maong seminar.

* * *

Magsugod na ang Bag-ong Tuig ugma ug malipayon na usab kitang mosaulog niini. Magsugod na usab ang atong paglawig sa bag-ong ang-ang sa atong pagpakabuhi ning kalibutana.

Ato lamang ipanghinaut nga mas daghan pang grasya ang moabot kanato sa 2007. Hinuon daghan ang naglantaw nga mas moarang-arang pa ang dagan sa ekonomiya sa Pilipinas karong 2007.

Malipayong Bag-ong Tuig kanatong tanan.

* * *

Ipadala inyong reaksiyon sa [email protected]