Nabitin ang mga Sugboanon

Nabahin karon ang mga Sugboanon sa tinuoray'ng desisyon pag-uswag sa pagpahigayon dinhi sa 12th Association of Southeast Asian Nations Summit ngadto sa Enero.

Kahinumdoman nga giuswag sa national organizing committee ang maong katiguman, nga gitakda untang ipahigayon niadtong niaging semana, tungod sa bagyong "Seniang" nga miigo sa northern Cebu.

Apan gawas sa maong bagyo, terorismo ang nakita sa uban nga rason pag-uswag sa maong dakong katiguman sa mga lideres sa ASEAN ug mga kaubang kanasuran. Kini nagsumikad usab sa mga advisory nga gipagawas sa Amerika, Britanya, Japan ug Australia kabahin sa hulga sa terorismo nga posible'ng mosabwag og kagubot atol sa ASEAN Summit.

Hinuon, puwerte'ng nakalimod ang kagamhanan nga kini ang hinungdan pag-postpone sa maong summit. Matud niini, ang hulga sa terorismo walay basihan gumikan kay wala sila nakadawat og taho kabahin niini.

Gani gikataw-an lamang sa mga otoridad ang taho nga sagolan sa mga terorista og hilo ang tinubdan sa tubig sa Sugbo atol sa pagpahigayon sa maong internasyonal nga katiguman.

Apan kun tinuod gayud nga terorismo ang hinungdan pag-uswag sa ASEAN Summit, usa kini ka dakong dagok sa kagamhanan tungod sa huyang nga seguridad nga gipatuman niini. Dili usab mabasol sa gobiyerno kadtong nagtuo nga terorismo gayud ang hinungdan pagsibog sa summit sa rason nga daan nang adunay taho nga posible'ng mosulong ang mga terorista atol sa maong katiguman.

Atong mahinumdoman nga liboan ka mga polis ug sundalo ang midugok sa Sugbo aron lamang pagtabang paghan-ay sa siguridad atol sa ASEAN Summit. Ug kun terorismo ang rason pag-uswag sa maong katiguman, siguro nakita sa kagamhanan nga dili gayud paigo ang puwersa nga gipakatap sa Sugbo pagmintenar sa kahusay ug kalinaw samtang ania dinhi ang mga lideres sa ubang kanasuran.

Siguro wala mobilib ang mga langyaw'ng kagamhanan sa kapabilidad sa atong mga otoridad gumikan sa ilang pagpagawas sa maong advisory. Apan basi sa atong nakita, wala usab magkulang ang atong kagamhanan sa implementasyon niini sa mga programa nga may kalabotan sa pagpatuman sa kahusay ug kalinaw atol sa ASEAN Summit.

Tungod niini, wala siguroy angay'ng kabalak-an ang mga langya'ng kagamhanan gumikan kay gibuhat sa gobiyerno sa Pilipinas ang tanan aron masiguro nga luwas ang ilang mga delegado.

Apan angay ba nga atong tuohan ang kagamhanan sa paghatag og rason nga bagyo ang hinungdan sa pag-uswag niini sa maong summit? Sa akong tan-aw dili tungod sa ka gamay sa maong rason.

Hinuon, dili usab ko moingon nga mas dunay kredibilibad kadtong mga nasud nga mipagawas og advisory. Kini sa rason nga dili usab konkreto ang ilang nadawat nga taho kabahin sa hulga sa terorismo atol sa pagpahigayon sa maong dakong katiguman.

Kinahanglan gayud nga makumbinse sa kagamhanan ang mga Sugboanon sa tinuoray'ng rason pag-uswag sa mao nga katiguman. Dili niini ikalimod nga mayoridad sa mga Sugboanon ang nagduda sa desisyon tungod kay matud nila, aduna pay dakong rason ngano nga gisibog sa NOC ang dako'ng kalihokan.

* * *

Ipadala inyong reaksiyon sa [email protected]