Palpak o gituyo?

Mapahiyumon nga mibiya sa hukmanan kagahapon ang usa ka ginang nga taga barangay Kinasang-an human siya giabswelto sa gipasaka kaniya nga kaso nga paglapas sa Dangerous Drugs Law.

Ang rason, nasayop ang kapolisan kay gilahi man nila pagpasaka og kaso si Isidra Tamarra nga unta matud sa huwes ang tukma iuban siya pagpasaka og kaso sa iyang bana.

Ang gihimo sa mga polis mao nga si Isidra gipasakaan nila og kaso nga paglapas sa section 16, Article III, Republic Act 6425 (Mao ni ang karaang drugs law), unya laing susama nga kaso gipasaka usab batok sa iyang bana nga si Rodelio Tamarra.

Gitataw ni Regional Trial Court judge Fortunato de Gracia nga kun gipasakaan pa sa kapolisan og kaso si Isidra nga ipon ra sa iyang bana, hayan mahimong lahi ang dagan sa estorya.

Bisan wala kaayo ipasabot ni Judge De Gracia apan aron masabtan sa kadaghanan, ingon man gud niini ang sitwasyon.

* * *

Ang kapolisan mironda sa balay ni Tamarra diha sa Paradise II, Kinasang-an kaniadtong gabii sa Enero 15, 2002. Ang search warrant gitumong alang ni Rodelio, kay siya man ang bana.

Ang pangangkon ni Isidra nga buwag na sila ug ang iyang bana kay duna na kini'y laing gikapuyo, didto sa Bangbang, Cordova.

Sa laktud, atol sa pag-search, usa ka bulto nga shabu nga may gibug-atong 50 gramos napalgan sa katre nga higdaanan sa magtiayon.

Kay asawa man si Isidra ni Rodelio, mahimo siya nga dakpon ug rekisahon kay legal man ang pagdakop. Gilatid kini sa Rule 126 sa Rules on Criminal Procedures.

Pagrekisa kuno sa mga polis, napalgan ang duha ka gagmay'ng pakete sa shabu gikan sa bulsa ni Isidra. Apan ang kahibudngan, nganong gibuwag man ang pagpasaka kaniya og kaso?

Kun buwagon nimo ang pagpasaka og kaso batok ni Isidra, mobalik na usab kita pagsukna kun unsay gibasihan sa pagdakop kaniya.

Apan nagduda si Judge De Gracia nga gituyo kadto sa mga polis kay human sa iyang pagkasikop, giubanan si Isidra sa mga polis ngadto sa bangko og gipakobra og P20,000.

Didto sa korte gibutyag ni Isidra nga duha sa mga polis nga miuban kaniya pagkobra sa kwarta didto sa Traders Royal Bank sa barangay Pasil.

* * *

Kining maong pasangil, dali ra kaayo pamatud-an. Ingon niini ang pag-imbistigar. Nadakpan sa mga polis si Isidra niana pang gabii sa Enero 15, 2002.

Ang pagkobra sa kwarta nahimo pagka-ugma na. Ayaw ko'g ingna nga gibuhian sa mga polis ang ilang dinakpan unya giingnan lang nga "Balik baya ha?"

Matud ni Judge De Gracia nga ang nahitabo mao ang usa ka "Pure and Siple Robbery" diin angay kini nga imbistigahon sa kadagkoan sa kapolisan ug silotan kadtong mga nagbinuang.

Hinahay ra bitaw nga daghan na kaayo ang ubos na og pagtan-aw sa mga polis tungod sa ilang mga binilyako nga kalihukan.

* * *

Si Rodelio Tamarra hinoon nakonbikto kay kuwang ug sayop ang iyang argumento nga yano lang pagpamakak.

Kun tinuod nga mibiya siya sa iyang panimalay ug didto na magpuyo sa Cordova, mahimo unta niyang kwestyonon ang search warrant apan wala niya kini himoa.

Maayo na lang gani kay nalooy pa si Judge De Gracia og unom ra g'yud ka tuig ang iyang maximum penalty. Nagpasabot nga kun kini pa ang unang higayon sa iyang pagka-konbikto, hayan maka-avail pa siya og probation.

Busa kamong mga polis, pagmatngon g'yud mo sa inyong kalihukan ug pagtoon sa mga lagda sa balaod aron nga dili kamo masayop.