Ug moadto na gyud ako sa Carnaza

Ang Dios Miingon
Pamalandong Matag Domingo
Disyrembre 3, 2006: Unang Domingo sa Adbiyento (Tuig sa Liturgical Cycle)
Mga Pagbasa: Jer. 14-16, /1Tes. 3:12-4:2/Lk. 21:25-28,34-36

Sa pagtagik nako ning maong pamalandong, ako moadto na gyud sa akong "Item" sa Carnaza Island. Seguro na gyud nga dili na ni mapaltos. Kay kun ang mga tawo dugay nang nagpaabot kanako, ako usab dugay na pud nga nangindahay nga makaadto. Mao nga alang kanako, tukma gyud ang akong pagtaak sa baybayon nila sanglit mao man kini ang akong adventus og pag-abut sa dapit diin ako ug ang dapit gitagana kanako.

Daghan kaayo kita og mga preparasyon kun adunay mga mahinungdanong mga bisita dili ba? Gani, sa ASEAN SUMMIT puhon dili tiaw ang pagpangandam sa kagamhanang lokal. Paanindot sa mga kadalanan, pag-ayo sa mga gubaon ug pagtudlo sa mga drayber aron sa Iningles mahanas. Maayo unta og pirme ang Summit aron kadalanan maayo. Luyo usab sa maong pagpangandam anaa pud ang pagpanaway og mga kritiko nga kun atong tan-awon kutob lang pud sa pagtagawtaw.

Ingon ini usab ang mensahe sa Adbiyento. Ang Dios naghagit kanato nga andamon ta dili ang bisan unsa nga makita lamang kun dili andamon ta ang atong kaugalingon sa pakighimamat sa atong manunubos ug hari nga nagpakatawo sa pasungan. Sa maong pagpangandam kinahanglang mosinati og paghashas sa mga motibasyong dili haom sa Kristohanong mithi ug kinaiya. Mga paghashas nga bunga lamang sa tawhanong kaarogante ug ka-iresponsable diha sa pagsaway sa mga sayop sa uban.

Ug nagtuo ako nga dako og ikatabang usab sa maong pagpangandam ang anaa sa Industriya sa Pagpanibya og sa mga Mantalaan. Himoon ang diwa sa Adbiyento nga masinati dili lang sa mga ritwal sa simbahan kun dili diha usab sa natad sa paghatud og mga balita og pagpaambit sa mga opinyon sa kahanginan og sa telebisyon. Kay sakit lang palandungon nga dunay uban nga manglisngag na lang ang ilong sa pagkyaw-kyaw sa mga bakak nga gisaglag pudyot sa matuod nga bunga sa hiwi nga pagtuo og pagsimba sa mentalidad: "Little learning is Dangerous!" Ako usab nag-ampo nga mahimong magmabungahon og makatabang sa akong paglambo ang sa Carnaza nga pagpuyo kay daghan ra ba ang mga mapahitas-on ug kasingkasing nga dili manuko pagdunggab ug pagwiwi sa giwangwang nang daan nga dignidad sa mga kaliwatan ni PADRE AMARO! Paghinulsol, pagpaubos, ug pag-ampo ang hagit sa Adbiyento kanato.

* * *

E-mail: [email protected]