Mga hari-hari

Ang Dios Miingon
Pamalandong Matag Domingo
Nobiyembre 26, 2006: Solemnidad ni Cristong Hari
Mga Pagbasa: Dn. 7:13-14/Gip. 1:5-8/Jn. 18:33-37

Kasagarang balansayon sa mga tawo ang magpakitang-gilas aron ingnon nga hawod. Daghan ang buot makahupot sa bisan unsang posisyon aron sa katawhan nga ilang mga hinanib sila tahuron. Ug mao man gani, nga ang kasagarang mahitabo nga daghan kanato ang nahimong hakog sa pasidungog ug sa gahum. Kay alang kanila, ang gahum nga nahuptan maoy nakapahimo kanilang bantugan.

Apan lahi ang nahitabo sa atong Ginoong Jesus. Laing matang sa pagkahari ang iyang gipakita. Wala siya magpasigarbo ug labaw na nga wala siya magpasiatab. Hinunoa diha sa kayano ug diha sa makanunayong pangalagad siya nakahupot og gahum ug kabantog.

Bisan asa ang pamolitika. Daghan ang nangindahay nga makabaton og pabor kang bisan kinsa nga giilang hawod ning kalibutana. Sa maong kinaiya ug sa maong balansayon daw sa nawad-an og paglaom ang mga mahuyang hut-ong ning atong katilingban. Simple apan mahagiton ang atong kasaulogan karong Domingoha. Gidasig kita nga mobalik-lantaw sa atong bunyag. Kita gidihogang hari aron mangalagad ug dili aron maghari-hari ug manlupig sa uban. Hinaut nga makaamgo ang mga pamunoan nato ning maong hagit ug mensahe kay daghan kanila ug daghan kanato ang nahimong mga hakog sa gahum ug pasidungog.

* * *

E-mail: [email protected]