EDITORYAL — Sugyot nga angay'ng hunahunaon

Si Philippine Star publisher Max V. Soliven, usa sa mga inila ug respetadong periodista dili lang sud sa atong nasud kundili usab sa gawas, mipadayag sa iyang kabalaka kabahin sa Cebu International Convention Center (CICC).

Sa iyang column sa Philippine Star adtong miaging Lunes, si Ginong Soliven nagkanayon nga kon dali-dalion ang pagtrabaho sa CICC aron lang magamit kini sa 12th ASEAN Summit ning umaabot nga Disyembre 11-14, 2006, basin og masakripisyo ang kalig-on niini diin mabutang sa kauwaw dili lang ang Sugbo kundili usab ang tibuok nasud nga Pilipinhon.

Nahadlok si Sir Max nga basin kon samtang nagsinukliay og ideya ang mga lider sa napulo ka sakop sa ASEAN nahugno ang atop sa CICC ngadto kanila. Hinuon kining hunahunaa kabahin ra sa iyang kabalaka kalabot sa kalig-on sa CICC kon ang pagtrabaho niini dinalidali.

Angay'ng hatagan og atensiyon ang hunahuna ni Sir Max ug ang iyang sugyot nga adto lang ipahigayon ang ASEAN Summit sa laing binyu sama sa Waterfront Cebu City Hotel diin adunay dakong convention center nga angay sab ikapanghambog sa mga Sugbuanon.

Anaa say laing alternatibo -- ang Shangri-La sa Mactan, diin daghan na usab nga mga dagkong kombensiyon ang gihimo.