Legacy ni Chief Justice Panganiban

Una sa tanan,daku ang pasalamat sa katawhan, ang mga tinuod nga people, dili kadtong giingon nga people's initiative nga kadudahan ang pagka-people, sa ruling sa supreme court pagsalikway sa gusto sa Malacañang nga dalion ang pag-usab sa Konstitusyon, waay eleksiyon sunod tuig, aron makapadayon sila sa gahom, ubos na konohay sa Parliamentary system, diin sila lang gihapon ang mamunoan.

Nindot kaayo alang nila ang ilang mga plano. Ug tungod kay ma-extended man ang ilang gahom, daghan kaayong mga local officials nga nagpabaga lang sa nawong, ug mipaluyo sa maong deceptive kaayo nga mga laraw.

Sa maong karaw, gumikan sa kanunay nga pagpangita sa kamatuoran pinaagi sa mga Senate investigations, wagtangon nila ang Senado nga alang kanila, nagsamoksamok, ug nagpakgang sa ilang mga tinguha pagpadayon sa gahom.

Pasalamat kita sa Senado, nga waa mo-toe the line sa mga tumong ug tuyo sa Lower House. Lakip kadtong giingon nga mga administration senators, nagabilin sa ilang baruganan pagpaibabaw sa welfare sa katawhan over and above politics.

Samtang miingon silang mga chacha advocates nga di pa sila mo-give up, daku ang akong pagtuo nga duna gyuy eleksiyon. Ug manghinaut usab kita nga si Comelec Chairman Abalos magbilin og legacy by making the 2007 election really clean and honest.

Ug sa atong mga politiko, ato silang hangyoon nga mosuway kono tag clean election. Please. Ug si Justice Panganiban, ato na siyang mahandom sa mga ruling sa Korte Suprema nga nahisupak sa kagustoan sa Malacañang. Gani, atong nakita nga sa ilang chacha ruling, waa gyud sila ma-dala sa mga pressure gikan sa Palasyo.

Ang legacy ni Chief Justice Davide mao ang pagpapanumpa ni Presidente Arroyo, samtang ang kang Panganiban, mao ang pagpakgang sa mga tinguha sa SIGAW NG BAYAN ug ULAP (ambut kinsay nagpaluyo ini nila) nga di na sila pulihan sa gahom pinaagi sa chacha ug people's initiative.

Indeed, tinuod gyud nga supreme ang supreme court. Hinumduman nga dihay mga isyo nga giyak-an lang ni Davide sulod sa dugayng panahon, apan, gihukman dayon ni Panganiban.

Saludar tang tanan ni Chief Justice Panganiban.