Ang VIP usahay diha sa pagpangalagad

Ang Dios Miingon

Pamalandong Matag Tuig

Oktubre 22, 2006: Ikakawhaag-siyam nga Domingo sulod sa tuig

Mga Pagbasa: Is. 53:10-11/Hb. 4:14-16/Mk. 10: 42-45

Kasagaran natong madungog sa mga diskurso sa mga lumansaray sa bisan unsa nga posisyon ang mga pamulong sama sa "Kanimo O Haring Lungsod akong Ihalad ang akong Kaugalingon sanglit ako man ang inyong Ubos nga Sulogoon ug Ulipon!" Pastilan dayong human sa maanindot nga talad kan-anan mga sud-ang lamian ang idalit kang Honorable Kagawad.

Gisaway si Jesu-Kristo sa iyang makanunayong pakighugoy-hugoy sa mga ubos ug mga hugaw sa ilang katilingban. Ang tipo sa iyang pagpangalagad lahi ra kaayo kon itandi sa mga pilantropo nga kutob ra sa hatag sa mga limos ngadto sa mga musimos.







Hinunoa, gihatag niya ang iyang kinatibuk-an sa iyang pagka-siya. Ang Krus mao ang nindot ug tabunok nga sanglitanan sa iyang tinuoray nga pagpangalagad nga taliwala sa iyang pagka-Dios namatay siya ingon og sama gayud sa usa ka ulipon aron ang maong kamatayon maghatag og kinabuhi sa kinabag-an.

Apan lahi ang kadaghanan kanato. Daghan kanato ang maningkamut nga mamahimong labaw ug mas gamhanan kaysa uban. Ang mga walay tingog og mga walay gahom ang mabiyaan na lamang sa lumba ug kompetisyon. Ug ang mas sakit mao nga kon mangalagad man gani, kinahanglang dunay mapaabut agig bawos sa kahago. Sa laktud nahimong ekonomikanhong basehan ang pag-alagad usab aron ang si bisan kinsa nga nalambigit ang mabuhi.

Hinumdoman ta ang atong bunyag. Gidihogan kita ingon nga Pari, Propeta ug HARI. Ang atong Pagka-HARI masukod lamang kon andam kita nga mopaubos sa atong kaugalingon alang sa uban nga mas nagkinahanglan pa kay kanato.

* * *

E-mail: [email protected]