EDITORYAL — OK lang kon malangay ang CICC

Kombinsido ang daghang tigpaniid sa dagan sa konstruksiyon sa Cebu International Convention Center nga ang edipisyo sa CICC mahuman gayud sa dili pa mahuman ang Nobiyembre.

Apan ang maong mga tigpaniid nagduda kon ang maong bilding magamit ba sa ASEAN Summit unya sa Disyembre 11-14, 2006.

Matud nila uyon sila sa pasalig ni Architect Manuel Guanzon nga sa pag-abot sa Nobiyembre 15 human na ang CICC. Apan, suma pa usab nila, magamit ba ang maong bilding sa Summit?

Daghan pa man gud ang trabahoon sud sa bilding una kini mamahimong functional. Electrical wirings, telephone lines, plumbing, carpeting, communication facilities, furnitures & fixtures, etc....Kinahanglan ma-put in place kun mapahimutang kini sa wa pa ang Summit meeting.

"Apan way angay'ng kabalak-an ang atong mga opisyal sa kagamhanan," matud pa sa usa ka tigpaniid. "Kon maapiki man gyud ang CICC, anaay daghang mga luhong hotel nga mahimong binyu sa panagtigum sa mga ASEAN leaders."

Busa kalma lang. Ipadayon lang ang pinustaanay. Basta kay way problema ang binyu sa ASEAN Summit kun malangay man ugaling ang CICC.