Dugang reklamo bahin skywalk

Kausa niana akong gihisgotan dinhi sa akong lindog ang mahitungod sa hugaw nga mga skywalk dinhi sa dakbayan sa Sugbo. Tungod sa maong item, napukaw ang pagpakabana sa mga magbabasa nga nakaobserbar usab sa kahugaw sa pipila ka mga skywalk sa siyudad. Mipadangat sila sa ilang reaksiyon ug obserbasyon dinhi sa akong lindog aron pagpadayag sa ilang mga hunahuna.

Ang unang text nagkanayon: "Ang akong reklamo bahin gihapon sa skywalk duol sa Robinsons. Naay makililimos diha nga anha mamuyo (puyo). Mao nga hugaw kaayo ug baho pa gyod. Ipahipos unta kana sila sa gov't. Kay eyesore kana sila." -- 0906-6849801 (September 25, 2006 -- 09:44:04)

Ang ikaduhang text nag-ingon: "Good day, Sir. Akong naobserbahan nga kanang skywalk atbang sa may UCLM, wala man kanay gamit kay molabang ra man sa dalan ang mga tawo labina ang mga estudyante diha. Hinaot pa unta nga maatiman na sa nahitungdan nga ahensiya." --0906-4957118 (Sept. 25, 2006-- 15:20:02)

Daghang salamat sa inyong text. Sa tinuod lang, pipila lang ang mga skywalk dinhi sa dakbayan nga gigamit gayod sa katawhan. Unsaon nga ang kadaghanan pod sa mga skywalk anaa man tukora sa dapit nga dili dansohanan sa daghang mga tawo. Sa ato pa, anaa sa dapit nga "tuyoon" na kaayo.

Aduna poy mga skywalk nga nahimutang unta sa dapit nga dansohanan sa daghang mga tawo apan maglikay pod sila sa pag-agi tungod kay hugaw kini kaayo. Mao nga angay gayod unta nga may magmintinar sa kalimpiyo sa mga skywalk. Ug kanang suliran sa mga makililimos nga anaa na magpuyo sa mga skywalk, angay kanang pangitaan og kasulbaran sa atong mga kadagkoan.

Aduna pod ing mga skywalk nga, gawas nga hugaw, kuyaw usab agian tungod kay gihimo kining imbudohanan sa mga isnatser ug tulisan. Tungod niini, angay gayod bantayan ang mga skywalk aron luwas kining kaagian sa mga tawo ug dili mahabwa ang ilang ginhawaan sa kabaho ug kaluod sa maong dapit nga hugaw kaayo. Hinaot unta nga masolusyonan na kini. Dili man kaayo dako kining maong problema, ba.

* * *

(Sumbong ug reklamo? Text sa 0910-8105522)