EDITORYAL - Sumbanan sa ubang polis

Matag karon ug unya adunay motumaw nga usa ka tinugyanan sa balaod kinsa nakahimo og buhat nga angay'ng daygon sa katilingban.

Ang labing ulahing tinugyanan sa balaod nga nakahimo niini mao si SPO1 Meliton Agadier, sakop sa kapolisan sa Carcar, Cebu.

Si Agadier miresponde sa usa ka tulis sa PUJ dinhi sa siyudad sa Sugbo bisan pa nga siya off-duty adtong higayona.

Diha-diha gidayeg si Agadier ni Mayor Tomas Osmeña kinsa mipahalipay kaniya pinaagi sa paghatag og reward nga P20,000 ug tanyag nga kon gusto siyag ari magpolis sa siyudad trabahuon dayon sa mayor ang pag reassign kaniya sa Cebu City.

Si Agadier mapasalamaton sa mga tanyag sa mayor apan matud niya ang iyang gihimo katumanan lamang sa iyang obligasyon isip polis.

Si Agadier maoy usa ka polis nga angayang himuong ehemplo sa ubang sakop sa kapolisan dili lang kay dinhi sa siyudad kundili usab sa ubang dapit.

Misaludo kami kanimo, SPO1 Meliton Agadier, ug hinaut unta nga molambo ang imong kaliwat.